ఇలా అయితే నలభైల్లో ఊబకాయం ముప్పు!

మహిళలు 20 ఏళ్లలోపు ఏడాదికి 1.74 కిలోలు బరువు పెరిగితే నలభైల చివరిలో ఊబకాయం లేదా ఒబెసిటీ బారిన పడుతున్నట్లు తాజా అధ్యయనం వెల్లడించింది. ఈ అధ్యయనం ప్రకారం మహిళలు ఏడాదికి 0.19 కిలోలు పెరిగితే ఆరోగ్యవంతంగానూ, 0.84 కిలోలు పెరిగితే అధికబరువుతోనూ, 1.74 కిలోలు పెరిగితే ఊబకాయం ముప్పును ఎదుర్కొంటారని తెలియజేసింది. ఆస్ట్రేలియాలోని యూనివర్సిటీ ఆఫ్ క్వీన్స్‌లాండ్ చేపట్టిన ఈ అధ్యయనానికి 18 నుంచి 23 ఏళ్ల మధ్య ఉన్న మహిళలను ఎంపిక చేసుకున్నారు. విడాకులు తీసుకున్నవారు, ఒంటరి మహిళలు, భర్త మరణించిన వారు, రోజుకు 10 కంటే ఎక్కువ సిగరెట్లు తాగేవారికి ఊబకాయం ముప్పు ఎక్కువని అధ్యయనంలో తేలింది.

యూనివర్సిటీ ఆఫ్ క్వీన్స్‌లాండ్‌కు చెందిన ప్రొఫెసర్ వాండే బ్రౌన్ నేతృత్వంలోని శాస్త్రవేత్తలు బృందం 4881 మంది స్త్రీల బీఎంఐని ప్రామాణికంగా తీసుకుని ఎవరు సాధారణ ఆరోగ్యకరమైన బరువుతో ఉన్నారు, 1996 నుంచి 2012 వరకు ఈ 16 ఏళ్లలో ఎవరు ఊబకాయంతో ఇబ్బంది పడ్డారో విశ్లేషించారు. ఇందులో 59.4 శాతం మంది బీఎంఐ ఆరోగ్యవంతమైన కేటగిరీలో ఉంటే, 29 శాతం మంది అధిక బరువు, 11. 6 శాతం మంది ఊబకాయం బారిన పడినట్లు తెలిసింది.

రోజుకు పదికి మించి సిగరెట్లు తాగే మహిళల్లో అధికబరువు పెరిగే అవకాశాలు 36 శాతం ఎక్కువని, పొగ తాగనివారు ఆరోగ్యకరమైన బరువు కలిగి ఉన్నారని తేలింది. నోటి ద్వారా గర్భనిరోధక మాత్రలు తీసుకున్నవారిలో 11 శాతం మంది సాధారణ బరువును అదుపులో ఉంచలేకపోయారు. ఈ పరిశోధన అంశాలను పోర్చుగల్‌లోని పోర్టోలో జరిగిన యూరోపియన్ కాంగ్రెస్ ఆన్ ఒబెసిటీలో వెల్లడించారు.