మగాళ్లూ జాగ్రత్త.. ఎక్కువ సేపు టీవీ చూస్తే కేన్సర్ ముప్పు!

ఎక్కువ సేపు టీవీ చూడటం వల్ల అనేక ఆరోగ్య సమస్యలు తలెత్తుతాయనే సంగతి తెలిసిందే. రోజుకు 4 గంటలకుపైగా టీవీ చూసే మగాళ్లకు కేన్సర్ ముప్పు అధికమని ఓ అధ్యయనం హెచ్చరిస్తోంది. 5 లక్షల మందికిపైగా స్త్రీ, పురుషులపై ఇందుకోసం అధ్యయనం నిర్వహించారు. తక్కువ సేపు టీవీ చూసే మగాళ్లు పెద్ద పేగు కేన్సర్ బారిన పడే ముప్పు తక్కువగా ఉన్నట్లు పరిశోధకులు గుర్తించారు. టీవీ ఎక్కువ చూసే 2391 మంది మగాళ్లకు ఆరేళ్ల తర్వాత కేన్సర్ వ్యాధి సోకినట్లు నిర్ధారించారు.

ఫ్రాన్స్‌లోని ఇంటర్నేషనల్ ఏజెన్సీ ఫర్ రీసెర్చ్ ఆన్ కేన్సర్, బ్రిటన్‌కు చెందిన ఇంపీరియల్ కాలేజీ లండన్, ఆక్స్‌ఫర్డ్ యూనివర్సిటీలు టీవీ చూసే అలవాటు, పెద్ద పేగు కేన్సర్ మధ్య సంబంధంపై అధ్యయనం నిర్వహించాయి.

శారీరకంగా శ్రమించడం పెరిగే కొద్దీ పురుషుల్లో కేన్సర్ ముప్పు తగ్గుతున్నట్లు అధ్యయనంలో తేలింది. కంప్యూటర్ స్క్రీన్‌కు, పెద్దపేగు కేన్సర్‌కు సంబంధం లేదని పరిశోధకులు తేల్చడం విశేషం.

ఎప్పుడూ ఒకే చోట కూర్చోవడం వల్ల బరువు పెరిగే ముప్పు పెరుగుతుంది. ఒంట్లో కొవ్వు పేరుకుపోతుంది. అధికంగా పేరుకుపోయిన కొవ్వు హార్మోన్ల స్థాయిలపై ప్రభావం చూపుతుంది. ఇది కణాల పెరుగుదలను ప్రభావితం చేసి.. పెద్ద పేగు కేన్సర్ రావడానికి దోహదం చేస్తుందని పరిశోధకులు తెలిపారు.

టీవీ ముందు గంటల తరబడి కూర్చోవడం వల్ల కేన్సర్ వస్తుందని చెప్పడానికి ఆధారాలేవీ లేవు. కానీ టీవీ చూస్తూ.. జంక్ ఫుడ్ ఎక్కువగా తినడం వల్ల బరువు పెరిగే అవకాశాలెక్కువ అని పరిశోధకులు తెలిపారు.