కలుషిత గాలి పీలిస్తే.. కిడ్నీ ఫెయిల్ ముప్పు!

వాయు కాలుష్యం వల్ల కిడ్నీ సంబంధిత జబ్బులు అధికం కావడంతోపాటు.. అవి ఫెయిలయ్యే అవకాశాలు కూడా ఉన్నాయని ఓ అధ్యయనంలో వెల్లడైంది. వాయు కాలుష్యం కారణంగా గుండె జబ్బులు, కేన్సర్, ఆస్తమా తదితర జబ్బులు వస్తుండగా.. వాటికి కిడ్నీ వ్యాధులు కూడా తోడవుతున్నాయి. వాషింగ్టన్ యూనివర్సిటీ స్కూల్ ఆఫ్ మెడిసిన్ అధ్యయనంలో ఈ విషయం వెల్లడైంది. గత ఎనిమిదన్నర ఏళ్ల కాలంలో కిడ్నీ జబ్బులు, వాయుకాలుష్యం గురించి దాదాపు 25 లక్షల మందిపై పరిశోధనలు జరిపి మరీ ఈ విషయాన్ని తేల్చారు.

గాలి నాణ్యతతో కిడ్నీల పనితీరును పోల్చి చూడగా.. మోతాదుకు మించి కలుషితమైన గాలిని పీల్చడం కిడ్నీ జబ్బులకు కారణం అవుతోందని తేలింది. కిడ్నీ వ్యాధులకు సంబంధించిన 44,793 కేసులు, 2,438 కిడ్నీ ఫెయిల్యూర్ కేసులపై వాయు కాలుష్యం ప్రభావం ఉందని గుర్తించారు. వాయు కాలుష్యం అధికంగా ఉంటే కంటికి కనిపించని చిన్న చిన్న ధూళి కణాలు, మురికి, పొగ, మసి మొదలైనవి అధిక మోతాదులో రక్తంలో కలుస్తాయి. హానికరమైన ఈ కణాలను వడగట్టడం కిడ్నీల పనితీరును దెబ్బతీస్తున్నట్లు పరిశోధకులు తెలిపారు.

అమెరికాకు చెందిన ఎన్విరాన్‌మెంటల్ ప్రొటెక్షన్ ఏజెన్సీ (ఈపీఏ) నిబంధనల ప్రకారం క్యూబిక్ మీటర్ గాలిలో 12 మైక్రో గ్రాములకు కాలుష్యం వల్ల ప్రజారోగ్యానికి ఇబ్బందేం ఉండదు. ఆ స్థాయికి మించితే మాత్రం ఆరోగ్యానికి ముప్పే.