weight loss mistakes: ఈ తప్పులు చేస్తున్నారా.. సమస్యలు వస్తాయ్‌ జాగ్రత్త..!

ఈ రోజుల్లో చాలా మంది అధిక బరువు సమస్యతో బాధపడుతున్నారు. ఆరోగ్యం, ఫిట్‌నెస్‌.. ఇలా కారణమేదైనా బరువును తగ్గించుకోడానికి నానాపాట్లు పడుతుంటారు. ఎలాగైనా బరువు తగ్గిపోవాలి.. అనే తపనతో, చాలీచాలని ఆహారం తింటారు. ఏవేవో డైటింగ్‌లు చేస్తారు. కొందరు మరింత ఎక్కువగా, తీవ్రంగా వ్యాయామం చేస్తూ త్వరగా బరువు తగ్గాలని భావిస్తుంటారు. బరువు తగ్గడం అంటే వ్యాయామం, ఆహారం మాత్రమే కాదు. సానుకూల మైండ్ సెట్‌తో ఉండటమూ చాలా ముఖ్యం. కొన్నిసార్లు మంచి ఆహారం, వ్యాయామం తర్వాత కూడా బరువు తగ్గడం చాలా కష్టం.

అటువంటి పరిస్థితిలో, మనం బరువు తగ్గే సమయంలో చేసే కొన్ని తప్పుల గురించి సెలబ్రిటీ న్యూట్రిషనిస్ట్ రుజుతా దివేకర్ తన ఇన్‌స్టాగ్రామ్‌ పోస్ట్‌లో షేర్‌ చేశారు. వెయిట్‌ లాస్‌ జర్నీలో మనం చేసే కొన్ని తప్పుల కారణంగా దుష్ప్రభావాలు ఎదుర్కొనే ప్రమాదం ఉందని రుజుతా దివేకర్‌ అన్నారు. ఈ చిన్న విషయాలను నిర్లక్ష్యం చేస్తే దీర్ఘకాలంలో డిప్రెషన్‌, యాంగ్జాయిటీ వంటి మానసిక వ్యాధుల బారిన పడే అవకాశం ఉందని హెచ్చరించారు.

బరువు తగ్గడం ఫిట్‌ బాడీకి సంబంధిచినది మాత్రమే కాదని, ఆరోగ్యానికి సంబంధించినదని న్యూట్రిషనిస్ట్ రుజుతా దివేకర్ అన్నారు. స్ట్రెంగ్త్‌, స్టామినా, ఫ్లెక్సిబిలిటీ, వెయిస్ట్‌- టు- హిప్‌ రేషియో కూడా ముఖ్యమని అన్నారు. బరువు తగ్గడానికి శరీరాన్ని హింసించే.. పద్ధతులు ఫాలో అవ్వొద్దని రుజుతా దివేకర్‌ అన్నారు.
గత అనుభవాల గురించి ఆలోచించొద్దు..

గతంలో మీరు బరువు తగ్గిన.. అనుభావాలు ఇప్పుడూ ఒకేలా ఉండవు. గతంలో మీకు డైట్‌‌‌‌ బాగా పని చేస్తే.. అది ఇప్పుడు సూట్‌ అవుతుందని చెప్పలేం. కాలానుగుణంగా మీ శరీరతత్త్వం మారే అవకాశం ఉంది.
టైమ్‌ పడుతుంది..

రిజల్ట్‌ కోసం కంగారు పడితే.. మంచిది కాదు. కొంత మంది ఇన్‌స్టెంట్‌ రిజల్ట్‌‌‌ రావాలని కోరుకుంటారు, ఒకవేళ వర్క్‌అవుట్‌ అవ్వకపోతే.. వెంటనే ఆ పద్ధతికి ముగించే, వేరే దానికి మారతారు. డైటింగ్‌, వ్యాయామం ఏదైనా.. మీ శరీరంలో పూర్తి మార్పులు చూడటానికి కనీసం మూడు నెలల సమయం తీసుకోవడం మంచిది.
కంగారు పడకండి..

తక్కువ సమయంలో బరువు తగ్గాలనే ఆలోచన మంచిది కాదని రుజుతా దివేకర్ అన్నారు. ఒక సంవత్సరంలో మీ శరీర బరువులో 10% తగ్గడం ఆరోగ్యకరమైన, స్థిరమైన విధానం అని చెప్పారు. బరువు తగ్గడానికి కంగారు పడితే.. శరీరానికి హాని కలిగే ప్రమాదం ఉందని అన్నారు.
ఈ తప్పులు చేయవద్దు..

కొంతమంది బరువు తగ్గడానికి, తక్కువగా తింటారు, ఎక్కువగా వ్యాయామం చేస్తారు.. ఇది తప్పు మార్గం అని రుజుతా దివేకర్‌ అన్నారు. వ్యాయామం, డైట్‌ సమపాలలో ఉండాలని అన్నారు. రోజూ అరగంట లేదా ఒక గంట వ్యాయామం చేస్తే సరిపోతుందని అన్నారు.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.