బ్లడ్ గ్రూప్‌ను బట్టే గుండెపోటు ముప్పు!

కరోనరీ హార్ట్ డిసీజ్ అనేది హృదయ ధమనుల్లో కొవ్వు పదార్ధాలు పేరుకుపోయినప్పుడు గుండెకు రక్త సరఫరాను నిరోధించడం, ఆటంకం కలిగించడం వల్ల ఏర్పడే రుగ్మత. కాలక్రమేణా ధమనుల గోడల్లో కొవ్వు పేరుకుపోయే ప్రక్రియను ఎథెరోస్కొలరోసిస్ అని, కొవ్వు నిల్వలను అథేరోమా అంటారు. ప్రపంచవ్యాప్తంగా సంభవించే మరణాల్లో కరోనరీ హార్ట్ డిసీజ్ మొదటి స్థానంలో ఉంది. మిగతా వ్యాధుల కంటే దీంతో చనిపోయేవారే అధికం. 2015లో ప్రపంచ వ్యాప్తంగా 17.7 మిలియన్ మంది ప్రాణాలు కోల్పోతే, సీఏడీ 7.4 మిలియన్ల మందిని పొట్టనబెట్టుకుంది. అంటే సుమారు 31 శాతం మంది ఈ రుగ్మతతో మరణించారు. అలాగే గుండెపోటులో 6.7 మిలియన్ మంది చనిపోయారు. అల్ప, మధ్యాదాయ దేశాల్లో కార్డియోవాస్క్యూలర్ వ్యాధి కారణంగా మరణించిన వారి సంఖ్య గత మూడు త్రైమాసికాల్లోనూ తగ్గుదల నమోదు చేసింది.

అయితే మన దేశంలో 52 శాతం మంది మరణానికి ఇదే కారణం కావడం గమనార్హం. ధూమపానం, మద్యం సేవించడం, అధిక రక్తపోటు, ఆహార నియమాలు పాటించకపోవడం, జీవనశైలిలో మార్పులతోపాటు జన్యువులు కూడా యుక్త వయసులో గుండెపోటుకు కారణమవుతున్నాయి. అయితే రక్త గ్రూప్ గుండె సంబంధ వ్యాధుల్లో కీలకపాత్ర పోషిస్తుందని నెదర్లాండ్‌కు చెందిన యూనివర్సిటీ ఆఫ్ మెడికల్ సెంటర్ గ్రోనిన్ంజెన్ ఇటీవల చేపట్టిన పరిశోధనలోవెల్లడయ్యింది. నాన్ ఓ గ్రూప్ కాని అంటే A, B, AB వారిలో గుండెపోటు, గుండె సంబంధ మరణాలు సంభవించే ప్రమాదం ఎక్కువని పరిశోధన బృందానికి నాయకత్వం వహించిన టెస్సా కోలే అన్నారు. కానీ కొన్ని నియంత్రిత అధ్యయనాల అధారంగా ఈ సూచనలు చేశామని, ఇలా జరుతుందనడానికి రుజువులు తక్కువగా ఉన్నాయని పేర్కొన్నారు.

ధీన్ని ధ్రువీకరించగలిగితే వ్యక్తిగత ఔషధాలపై తీవ్ర ప్రభావం చూపుతుందని తెలిపారు. యూరోపియన్ సొసైటీ ఆఫ్ కార్డియాలజీలో ఈ పరిశోధన వివరాలను వెల్లడించారు. నాన్- ఓ గ్రూప్ కాని వ్యక్తులకు గుండెపోటు ముప్పు 9 శాతం అధికమని అధ్యయనంలో పాల్గొన్న 1.3 మిలియన్ల మందిని పరిశీలించి తెలిపారు. రక్తవర్గం రక్త కణాలలో ఉన్న ప్రతిరక్షకాలు, యాంటిజెన్ల ప్రత్యేక మిశ్రమంపై ఆధారపడి ఉంటుంది. అంతేకాదు తల్లిదండ్రుల రక్తం ఆధారంగా జననానికి పూర్వమే ఇది నిర్ణయించబడుతుంది. ఓ గ్రూప్ అనేది సాధారణం, ఇండియాలో 37 శాతం మంది ఈ వర్గానికి చెందినవారే.