చైనీస్ మెహందీతో చేతులకు డేంజర్?

దీపావళి హడావుడి అప్పుడే మొదలైంది. పండగ కోసం టపాసులు కొనుగోలు చేసేందుకు మగవారు సన్నద్ధం అవుతుంటే.. అలంకరణ కోసం మెహందీ, ఇతర మేకప్ కిట్ కొనేందుకు ఆడవాళ్లు సిద్ధపడుతున్నారు. అయితే ఈ సందర్భంగా ఫేస్‌బుక్‌లో చైనీస్ మెహందీ వాడితే ఎలాంటి దుష్ఫలితాలు ఉంటాయనే దానికి తార్కాణంగా ఓ ఫొటో వైరల్ అవుతోంది. మహిళలకు మెహందీ అంటే ఎంతో ఇష్టమనే సంగతి తెలిసిందే. అయితే మెహందీ కొనుగోలు చేసే ముందు ఒకటికి రెండు సార్లు ఆలోచించండి. ఎందుకంటే చైనీస్ మెహందీ వాడటం వల్ల చర్మం ఎంతలా కమిలిపోయిందో, ఎంత డ్యామేజ్ అయిందో సూచిస్తూ కొన్ని ఫొటోలు ఫేస్‌బుక్‌లో ఇతర సోషల్ మీడియా సైట్లలో వైరల్ అవుతున్నాయి. ఈ మెహందీ చైనాలో తయారైందనే విషయం బాగా వ్యాపిస్తోంది. కాబట్టి మెహందీ కొనే ముందు జాగ్రత్తగా ఉండండి.

ఈ విషయమై ‘ఇండియన్ ఎక్స్‌ప్రెస్’ వైద్యుల్ని సంప్రదించగా.. చైనాలో తయారైన మెహందీ పేస్టులతోనే ఈ తరహా సమస్య ఉందనే ప్రచారంలో నిజం లేదని, వాస్తవానికి చాలా వరకు హెన్నా ఉత్పత్తులు, హెయిర్ డైలలో హానికర రసాయన పదార్థాలు ఉంటున్నాయని వెల్లడించారు. అమ్మోనియా రహిత సహజ హెయిర్ కలర్స్ అని ప్రచారం చేసి అమ్మకాలు సాగించే ఉత్పత్తుల్లోనూ ఈ కెమికల్స్ ఉంటున్నాయని డాక్టర్లు చెప్పారు. మహిళలను నుదుట పెట్టుకునే సింధూరంలోనూ రసాయన పదార్థాలు ఉంటున్నాయని, వీటి కారణంగా అలర్జీలు వ్యాపిస్తున్నాయని డాక్టర్లు తెలిపారు. ఇలాంటి 90 శఆతం ఉత్పత్తుల్లో పారాఫినైలిన్‌డయామైన్ (పీపీడీ), ఫినైల్‌మెర్క్యూరిక్ నైట్రేట్, పొటాషియం డైక్రోమేట్ లాంటి రసాయనాలు ఉంటున్నాయన్నారు. కాబట్టే కొనుగోలు చేసే ముందు ప్యాక్‌పై వివరాలను ఒకటికి రెండుసార్లు చదువుకోవాలని చెబుతున్నారు. రోడ్ల వెంబడి తక్కువ ధరకే దొరికే మెహందీ పట్ల అప్రమత్తంగా ఉండాలని, వాటిలో విష రసాయనాలు కలిసే అవకాశం ఉందని కూడా హెచ్చరిస్తున్నారు.