ఎసిడిటీ వేధిస్తోందా..? లవంగంతో ఇలా చేసి చూడండి

మీకు ఎసిడిటీ సమస్య ఉందా? కడుపులో లేదా ఛాతిలో మంటతో ఇబ్బంది పడుతున్నారా..? ఈ సమస్యను వంటిట్లో లభించే లవంగంతో పరిష్కరించొచ్చు. స్పైసీ ఫుడ్స్ తీసుకోవడం, వ్యాయామం చేయకపోవడం, వేళకు తినకపోవడం, ఎక్కువగా ఆల్కహాల్ తాగడం, ఒత్తిడి వల్ల ఎసిడిటీ సమస్య వస్తుంది. ఈ సమస్యను వంటల్లో విరివిగా వాడే లవంగంతో పరిష్కరించొచ్చు. తలనొప్పి, కేన్సర్లు, డయాబెటిస్, ఇన్ఫెక్షన్లు, సైనస్, ఫ్లూ, జలుబు తదితర వ్యాధులు రాకుండా చూడటంలో లవంగం తోడ్పడుతుంది.

లవంగం రోగనిరోధక వ్యవస్థను బలోపేతం చేసి, కాలేయాన్ని సంరక్షిస్తుంది. ఎముకలను ధృడంగా చేస్తుంది. లవంగాలను యాంటీ సెప్టిక్‌గా, నోటి సమస్యల పరిష్కారానికి, దుర్వాసనను అరికట్టడానికి విరివిగా ఉపయోగిస్తారు. టీ, జ్యూస్, స్వీట్లలో లవంగాన్ని వాడతారు. ప్రత్యేకంగా నూనె రూపంలోనూ దొరుకుతుంది.

లవంగం తినడం వల్ల నోట్లో లాలాజల ఉత్పత్తి పెరుగుతుంది. ఇది ఆహారం త్వరగా జీర్ణం కావడానికి తోడ్పడుతుంది. కాబట్టి భోజనం ముగిశాక లవంగం నమలితే ప్రయోజనం ఉంటుంది.ఎసిడిటీ నుంచి తక్షణ ఉపశమనం లభించడానికి లవంగం నమలడం ఉపకరిస్తుంది. కడుపులో గ్యాస్ ఏర్పడకుండా ఇది చూస్తుంది. నోట్లో లవంగం ముక్క ఉంచుకొని మెల్లగా నమలడం వల్ల.. కడుపులో యాసిడ్ స్థాయిలు తగ్గుతాయి. ఎసిడిటీ నుంచి ఉపశమనం లభిస్తుంది.

చల్లటి పాలు, మజ్జిగ, తులసి ఆకులు, యాలకులు, కొబ్బరి నీళ్లు, బెల్లం, ఆపిల్ సీడర్ వెనిగర్, అల్లం మొదలైన వాటిని ఆహారంగా తీసుకోవడం వల్ల ఎసిడిటీ సమస్యను కొంత వరకు అధిగమించొచ్చు.