అది తగ్గిస్తే అర్థరాత్రి బాత్రూం అవసరం ఉండదు!

ఉప్పు ఎంత తక్కువ తీసుకుంటే ఆరోగ్యానికి అంత ఎక్కువ మేలు జరుగుతుందని వైద్యులు సూచిస్తుంటారు. ఇలా చేస్తే అనారోగ్య సమస్యలు దూరంగా ఉండటమే కాదు, భవిష్యత్తులో ఎలాంటి ఇబ్బందులు తలెత్తవు. ఉప్పు తక్కువ మోతాదులో తీసుకోవాలని, అసలు మనం తీనే ప్రతి ఆహారంలోనూ కాస్త పరిమాణంలో ఉప్పు ఉంటుందని పరిశోధకులు తెలియజేస్తున్నారు.

కొంత మందికి మధ్యరాత్రిలో మూత్ర విసర్జన అలవాటు ఇబ్బంది పెడుతుంది. అలాంటి వారికి జపాన్‌లోని నాగసాకి యూనివర్సిటీ పరిశోధకులు చేసిన పలు అధ్యయనాలు ఉపశమనం కలిగిస్తాయి. ఉప్పు వాడకాన్ని తగ్గిస్తే రాత్రిపూట నిద్ర మధ్యలో మూత్ర విసర్జనకు లేవాల్సిన అవసరం తగ్గుతుందని పరిశోధనలో తేలింది. 223 వ్యక్తులపై జరిపిన అధ్యయనంలో ఈ విషయం రుజువైంది. నిద్ర మధ్యలో మూత్ర విసర్జనకు లేవడాన్ని నొక్టోరియాగా పేర్కొంటారు. ఉప్పు తక్కువగా తీసుకుంటే నిద్రలో నుంచి లేవాల్సిన అవసరం ఉండదని వారు తెలిపారు.

పరిశోధనలో భాగంగా 223 మంది వ్యక్తులను తీసుకున్నారు. వారు రోజువారీ తీసుకునే ఉప్పు పరిమాణాన్ని 25 శాతం తగ్గించి ఇచ్చారు. రోజులో 10.7 గ్రాముల నుంచి 8 గ్రాములకు తగ్గించడం వల్ల రాత్రిపూట మూత్ర విసర్జన స్థాయి కూడా 2.3 నుంచి 1.4 సార్లకు పడిపోయింది. అలాగే 98 మందికి 9.9 గ్రాముల నుంచి 11 గ్రాములకు మోతాదు పెంచడం వల్ల రాత్రి వేళలో మూత్ర విసర్జన 2.3 సార్లు నుంచి 2.7 సార్లకు పెరిగింది.

యువకులు రోజుకు సగటున 6 గ్రాములకు మించి ఉప్పు తీసుకోరాదని నాగసాకీ యూనివర్సిటీ ఆఫ్ హెల్త్ సైన్సెస్ పరిశోధకులు సిఫార్సు చేస్తున్నారు. దీని వల్ల రక్తపోటు స్థాయి తగ్గుతుందని పేర్కొంటున్నారు. మూత్ర విసర్జనకు ఉప్పు ప్రభావంపై ఇది మొట్టమొదటి అధ్యయనం అని నాగసాకీ యూనివర్సిటీకి చెందిన ప్రొఫెసర్ డాక్టర్ మత్స్యే టుమొహిరో తెలిపారు. అర్థరాత్రిలో మూత్ర విసర్జన చాలా మంది వ్యక్తులు ఎదుర్కొంటున్న సమస్య, ముఖ్యంగా ఇది వృద్ధులకు మరింత ఇబ్బంది కలిగిస్తుంది.