రోజూ టీ తాగుతున్నారా?.. మీకో గుడ్ న్యూస్

రోజుకో కప్పు కాఫీ లేదా టీ తాగుతున్నారా? మీరు తేనీటి ప్రియులా? అయితే మీకో శుభవార్త. కాఫీ లేదా టీ తాగనివారితో పోలిస్తే.. తాగేవారు ఎక్కువ కాలం జీవిస్తున్నట్లు ఓ అధ్యయనంలో తేలింది. కాఫీ, టీలలో కెఫిన్ ఉంటుందనే సంగతి తెలిసింది. ఇది వాపు, నొప్పులకు కారణమయ్యే రసాయనాలు రక్తంలో కలవకుండా అడ్డుపడుతుందట. ఇవి రక్తంలో కలిస్తే రక్తనాళాలు వాచిపోయి గట్టిపడతాయి. ఫలితంగా గుండె జబ్బుల బారిన పడే ముప్పు పెరుగుతుంది. కానీ ఈ రసాయనాలు రక్తంలో కలవకుండా కెఫిన్ అడ్డుకోవడం వల్ల ఎక్కువ కాలం జీవించడానికి వీలవుతుందని నేచర్ మెడిసిన్ అనే అధ్యయనంలో తేలింది. స్టాన్‌ఫోర్డ్ యూనివర్సిటీ పరిశోధకులు కూడా ఈ విషయాన్ని నిర్ధారించారు.

చాకొలేట్, థియోబ్రొమైన్‌లలోనూ వాపును తగ్గించే పదార్థాలున్నాయట. 20-30 ఏళ్ల మధ్య వయసున్న వారిలో కెఫీన్ ప్రభావం విషయమై పరిశోధనలు సాగుతున్నాయి. రక్త నాళాల వాపునకు ప్రధానంగా కారణమయ్యే ఇంటర్‌ల్యూకిన్-1-బీటా అనే కెమికల్‌తో కెఫీన్ పోరాడుతోందని మానవ కణాలపై నిర్వహించిన పరిశోధనలో వెల్లడైంది.


ఎలుకల్లోకి ఇంటర్‌ల్యూకిన్-1-బీటా రసాయనాన్ని ప్రవేశపెట్టి చూడగా.. వాటిలో రక్తపోటు తీవ్రం కావడంతోపాటు.. రక్తనాళాలు వాచిపోవడాన్ని గుర్తించారు. రక్తం గడ్డకట్టడానికి ఇది కారణం అవుతోందని గుర్తించారు. కెఫిన్ దీని ప్రభావాన్ని సమర్థవంతంగా అడ్డుకోవడం పట్ల పరిశోధకులు ఆశ్చర్యం వ్యక్తం చేశారు. మరి ఇంకేం హ్యాపీగా టీ, కాఫీలను లాగించేయండి.