మగవాళ్లకు మోనోపాజ్ వచ్చేస్తోంది

మోనోపాజ్...మలి వయసులో మహిళల పాలిట శాపం. 50 ఏళ్లు దాటిన మహిళల్లో రుతుచక్రం శాశ్వతంగా ఆగిపోవడాన్నే మోనోపాజ్ అంటారు. ఒంట్లో హార్మోన్ల శాతం ఒక్కసారిగా తగ్గిపోవడంతో శారీరక, మానసిక ఇబ్బందులు ఎదురురవుతాయి. మరి ఆడవాళ్లలో మోనోపాజ్ దశ ఉన్నట్లే మగవాళ్లలో కూడా ఇలాంటి దశ ఉంటుందా. ఉంటే అసలు ఆ దశను ఏమని పిలుస్తారు. చాలా మంది మగవాళ్లకు తెలియని విషయం ఇది. ఆడవాళ్లు మోనోపాజ్ తో ఇబ్బంది పడ్డట్లే మగవాళ్లు కూడా ఆండ్రోపాజ్ తో ఇబ్బంది పడతారు. మలి వయసు మగవాళ్ల ఒంట్లో వచ్చే హార్మోన్ల తగ్గుదలనే ఆండ్రోపాజ్ అంటారు. ఈ దశలో టెస్టోస్టిరాన్ హార్మోన్ ఉత్పత్తి ఒక్కసారిగా తగ్గిపోతుంది.స్త్రీల మాదిరిగానే మగవాళ్లు కూడా ఆండ్రోపాజ్ దశలో శారీరక, మానసిక రుగ్మతలకు గురి అవుతారు. నిద్రలేమి, కుంగుబాటు, ఒంట్లో శక్తి తగ్గిపోవడం తదితర ఇబ్బందులకు గురి అవుతారు. ఎముకల పటుత్వం దెబ్బతింటుంది. మునుపటి ఆత్మవిశ్వాసం ఉండదు. లైంగిక సామర్థ్యం కూడా గణనీయంగా తగ్గిపోతుంది. కొందరిలో అయితే ఏకంగా స్త్రీల మాదిరిగా బ్రెస్ట్ పెరుగుతుంది.

మోనోపాజ్ v/s ఆండ్రోపాజ్:
రుతుచక్రం ఒక్కసారిగా ఆగిపోవడంతో స్త్రీ శరీరంలో మార్పులు వేగంగా చోటుచేసుకుంటాయి. కాని మగవాళ్లలో మాత్రం ఈ మార్పు చాలా కాలం పాటు అంతర్లీనంగా జరుగుతూ ఉంటుంది. మూడు నాలుగేళ్ల పాటు ఈ ప్రక్రియ కొనసాగుతుంది. మగవాళ్లలో ఎప్పుడు ఎవరికి ఆండ్రోపాజ్ వచ్చిందో తెలసుకోవడం కూడా కష్టమే అని వైద్యులు అంటున్నారు. అంతర్లీనంగా మనిషికే తెలియకుండా వ్యక్తి శరీరక, మానసిక స్థితుల్లో మార్పు వస్తుందని చెబుతున్నారు.

ఆండ్రోపాజ్ దశలో తండ్రి అయితే :
స్త్రీలలో మాదిరిగా పునరుత్పత్తికి 100శాతం దూరం కాకున్నా, చాలా మటుకు అవకాశాలను ఆండ్రోపాజ్ లో మగవాళ్లు కోల్పోతారు. పైగా పుట్టే బిడ్డలు కూడా శారీరకంగా, మానసికంగా అంత బలిష్టంగా ఉండరు.

ఆండ్రోపాజ్ నుంచి గట్టెక్కడం ఎలా?
మంచి జీవన పద్దతులు, ఒత్తిడి లేని జీవితం, మానసిక ప్రశాంతత, వ్యాయామం తదితర జాగ్రత్తలు పాటించడం తప్ప మరో మార్గం లేదు. ఒక వేళ ఆండ్రోపాజ్ దశ వేగంగా పురోగమిస్తూ ఉంటే డాక్టర్ ని సంప్రదించి మందులు తీసుకోవాలి.