స్నానం చేయకపోయినా...అతిగా చేసినా అనర్థమేనట!

రోజుకు రెండుసార్లు స్నానం చేస్తే ఆరోగ్యంగా ఉంటామని నమ్ముతారు. కానీ ఈ ఆలోచనను మార్చుకోవాల్సి వస్తుందని కొత్త సర్వే అంటోంది. అతిగా శుభ్రం చేసినా, ఎక్కువసార్లు స్నానం చేసినా శరీరంలోని అతి సూక్ష్మజీవ వ్యవస్థకు నష్టం వాటిళ్లి రోగనిరోధక, జీర్ణ వ్యవస్థలు దెబ్బతినడంతో గుండెకు ముప్పుకలుగుతుందని వైద్యులు హెచ్చరిస్తున్నారు.

కొద్ది రోజులు స్నానం చేయకపోతే దుర్వాసన వస్తుంది. అయితే అతిగా స్నానం చేయడం వల్ల శరీరానికి మేలు కంటే కీడే ఎక్కువని యూనివర్సిటీ ఆఫ్ ఉటాకి చెందిన జెనెటిక్ సైన్స్ సెంటర్ పరిశోధకులు అంటున్నారు. అతిగా స్నానం, శరీరాన్ని శుభ్రపర్చుకున్నా అది మానవ మైక్రో బియోమ్‌ను దెబ్బతీస్తుందని తెలిపారు. మైక్రోబియోమ్ అంటే శరీరానికి అంటిపెట్టుకుని ఉండే సూక్ష్మజీవులైన బ్యాక్టీరియా, వైరస్‌‌ల కలెక్షన్.

మానవుని ఆరోగ్యానికి మైక్రోబియోమ్ ఎంతో అవసరం. అతిగా స్నానం చేయడం, పదే పదే పరిశుభ్రం చేయడం వల్ల చేస్తే ఈ సూక్ష్మ జీవావరణ వ్యవస్థకు హాని కలిగి రోగనిరోధక, జీర్ణవ్యవస్థలతోపాటు చివరకు గుండె కూడా దెబ్బతినే అవకాశం ఉందని పరిశోధకులు వివరించారు.

అమెజాన్‌ ప్రాంతలోని యనోమమి గ్రామంలో పరిశోధన చేసిన శాస్త్రవేత్తలు అక్కడ నివసిస్తున్న ప్రజల చర్మంలో సూక్ష్మ జీవవ్యవస్థ సమృద్ధిగా ఉందని గుర్తించారు. అంతే కాకుండా వీరి శరీరంలో వైవిధ్యపూరితమైన బ్యాక్టీరీయాతో జన్యు వ్యవస్థ ఏర్పడిందని పరిశోధకులు పేర్కొన్నారు. అలాగే తరచూ షాంపూలు వాడే జీవన శైలి గల ప్రాంతాల్లోని మానవుల సూక్ష్మజీవ వ్యవస్థలో వైవిధ్యం దెబ్బతిన్నట్లు తెలియజేశారు.

స్నానం పూర్తిగా మానేసినా సమస్యేనని, అయితే ఇలాంటి వాళ్లు చాలామంది ఉన్నట్లు ఈ పరిశోధనలో తెలింది. దీనిపై ది అట్లాంటిక్ పత్రిక సీనియర్ ఎడిటర్ జేమ్స్ హాంబ్లిన్ తన అనుభవాన్ని పంచుకున్నారు. స్నానం మానేశాక నా చర్మం జిడ్డుకారుతూ, దుర్వాసన వచ్చేది. అయితే దీనికి నా శరీరం సర్దుబాటు కావడంతో ఈ ఫీలింగ్ తనకు లేదని ఆయన అన్నారు.

స్నానం ఆపేసిన కొంత కాలం తర్వాత మన శరీర వ్యవస్థ ఒక స్థిరత్వ స్థితికి చేరుకోవడంతో చర్మం నుంచి పెద్దగా వాసన రాదని జేమ్స్ తెలిపారు. అయితే ఒళ్లు రోజ్ వాటర్ లేదా యాక్స్ బాడీ స్ప్రే వాసనను తలపించదని, అలాగని స్నానం చేయని జంతువుల నుంచి కూడా దుర్వాసన రాదని వెటకారంగా అన్నారు.