amaranth leaves health benefits: మీ గుండె ఆరోగ్యాన్ని రక్షించే.. తోటకూర..!

తోటకూరలో మెగ్నీషియం పుష్కలంగా లభిస్తుంది. ఇది గుండె ఆరోగ్యానికి మేలు చేస్తుంది. దీనిలో ఫినోలిక్ యాసిడ్ అధికంగా ఉంటుంది. ఇది అనేక వ్యాధులను నివారించడంలో సహాయపడుతుంది, గుండె కండరాలను బలోపేతం చేస్తుంది. తోటకూరలో రుటిన్‌, నికోటిఫ్లోరిన్ వంటి ఫైటోకెమికల్స్ ఉంటాయి. ఇవి హైపర్‌టెన్షన్‌ తగ్గించడంలో సహాయపడతాయి. హైబీపీ కంట్రోల్‌లో ఉంటే.. గుండె సమస్యల ముప్పు తగ్గుతుంది. దీనిలో అసంతృప్త కొవ్వు ఆమ్లాలు, టోకోఫెరోల్స్, పాలీఫెనాల్స్ ఉంటాయి. ఇవి అనేక ఆరోగ్య ప్రయోజనాలను అందిస్తాయి. తోటకూరల మన డైట్‌లో చేర్చుకుంటే.. కొలెస్ట్రాల్, ట్రైగ్లిజరైడ్స్, లిపోప్రొటీన్ (LDL), తక్కువ లిపోప్రొటీన్ (VLDL) స్థాయిలను గణనీయంగా తగ్గిస్తుంది.

తోటకూరలో కాల్షియం, ఫాస్పరస్ అధికంగా ఉంటాయి. ఇవి ఎముకలను బలోపేతం చేయడంలో సహాయపడతాయి. ఆస్టియోపోరసిస్‌ సమస్యతో బాధపడే మహిళలు తోటకూరను డైట్‌లో కచ్చితంగా చేర్చుకోవాలని డాక్టర్ డింపుల్ జంగ్దా సూచించారు. తోటకూరలో అధికంగా ఉండే.. లైసిన్ కాల్షియం శోషణకు సహాయపడుతుంది. దీనిలో ఉండే.. ఎల్-అర్జినైన్‌ ఆస్టియోక్లాస్ట్ సెల్ యాక్టివిటీని మాడ్యులేట్ చేస్తుంది. తోటకూర తరచుగా తీసుకుంటే.. ఎముకల ఆరోగ్యానికి మేలు జరుగుతుంది.

తోటకూరలో ఫైబర్‌ అధికంగా ఉంటుంది. ఫైబర్‌ జీర్ణాశయంలో ఎక్కువసేపు ఆహారం అక్కడే ఉండేలా చేస్తుంది. కడుపు నిండిన భావన కలిగిస్తుంది. ఆహారం త్వరగా జీర్ణం కాకుండా చూస్తూ రక్తంలోకి గ్లూకోజు నెమ్మదిగా వెళ్లేలా చేస్తుంది. పైబర్‌ జీర్ణక్రియను మెరుగుపరుస్తుంది. తోటకూరు తరచుగా తింటే.. మలబద్ధకం సమస్య దూరం అవుతుంది. హెలికోబాక్టర్ పైలోరీ వల్ల డ్యూడెనల్ పెప్టిక్ అల్సర్, దీర్ఘకాలిక పొట్టలో పుండ్లు ఉన్నవారు తోటకూర తింటే మేలు జరుగుతుంది.

తోటకూరలో యాంటీ హైపర్గ్లైసీమిక్ లక్షణాలు ఉన్నాయి. ఇది టైప్‌ 2 డయాబెటిస్‌‌‌‌‌‌‌‌‌‌‌‌‌‌‌‌ వారికి మంచిది. తోటకూర రక్తంలో చక్కెర స్థాయిని తగ్గిస్తుంది. తోటకూరలో ఉండే ప్రోటీన్‌ రక్తంలో ఇన్సులిన్‌‌ స్థాయిని తగ్గించడంలో సహాయపడుతుంది. తోటకూర ఆకలిని తగ్గిస్తుంది, అతిగా తినడాన్ని నిరోధించే హార్మోన్లను ఉత్పత్తి చేస్తుంది..

అనారోగ్యకరమైన ఆహారం, పోషకాహార లోపం కారణంగా ఆరోగ్య సమస్యలను ఎదుర్కొంటున్న వ్యక్తులకు తోటకూర చాలా ఉపయోగకరంగా ఉంటుంది. పిల్లలు, టీనేజర్లు, పెద్దలు, వృద్ధులకు, అనోరెక్సియా వంటి వ్యాధులు ఉన్నవారికి కూడా తోట కూర మేలు చేస్తుంది.

గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.