యుక్త వయసులోనే బట్టతల, తెల్ల జుట్టు.. ఊబకాయం కంటే డేంజర్!

మీరు 40 ఏళ్లలోపు వయస్కులా? మీకు బట్టతల ఉందా? లేదంటే జట్టు తెల్లబడిందా..? అయితే జాగ్రత్తగా ఉండండి. ఇలాంటి లక్షణాలు ఉన్నవారికి గుండెజబ్బులు వచ్చే ముప్పు ఎక్కువని ఓ అధ్యయనంలో వెల్లడైంది. రెండు వేల మందికిపైగా భారతీయ యువకులపై చేసిన అధ్యయనంలో ఈ విషయం వెల్లడైంది. ఊబకాయంతో సతమతం అవుతున్న వారి కంటే.. బట్టతల, తెల్లజుట్టు ఉన్నవారికే గుండెపోటు వచ్చే ప్రమాదం ఐదు రెట్లు ఎక్కువని సదరు అధ్యయనం వెల్లడించింది.

ఊబకాయం, డయాబెటిస్, జీవన విధానాలే గుండె జబ్బులు రావడానికి ప్రధాన కారణాలుగా భావించారు. కానీ బట్టతల, తెల్లజుట్టు రావడం అనేవి వాటి కంటే డేంజర్ అని తేలింది. గుండె జబ్బుల ముప్పు బట్టతల ఉన్నవారికి 5.6 రెట్లు, తెల్లజుట్టు ఉన్న వారికి 5.3 రెట్లు అధికమని పరిశోధనల్లో తేలింది. ఊబకాయంతో హృద్రోగాలు వచ్చే ముప్పు నాలుగు రెట్లేనని, దానికి మించి బట్టతల, తెల్ల జుట్టు వల్ల గుండె జబ్బులు వచ్చే ప్రమాదం ఎక్కువని పరిశోధకులు చెబుతున్నారు.

యుక్త వయసులోనే బట్టతల, తెల్లజుట్టు లాంటి సమస్యలు ఎదుర్కొనే వారికి గుండెపోటు ముప్పు అధికమని పరిశోధనకు నేతృత్వం వహించిన అహ్మదాబాద్‌లోని యూఎన్ మెహతా ఇన్‌స్టిట్యూట్ అసోసియేట్ ప్రొఫెసర్ డాక్టర్ కమల్ శర్మ తెలిపారు. ఈ అధ్యయనాన్ని కేవలం భారతీయులపైనే చేపట్టారు. కాబట్టి ఇతర దేశాల ప్రజల ఆహార అలవాట్లు, ఇతర అంశాల విషయంలో విస్తృతంగా పరిశోధనలు చేయాల్సిన అవసరం ఉందన్నారు.