ఆ చిన్నారి గుండె ఛాతి నుంచి బయటకొస్తోంది!

మనం సంతోషంగా ఉండటానికి, ఆరోగ్యవంతమైన జీవితాన్ని గడపడానికి నవ్వడం ఎంతో ముఖ్యం. నవ్వు ఒక యోగం. చిరునవ్వుతో ఎదుటి వ్యక్తి కోపాన్ని దూరం చేయొచ్చు. కానీ ఓ చిన్నారికి మాత్రం చిరునవ్వే శాపంగా మారింది. తన నవ్వుకు గుండె ప్రతిస్పందిస్తోందా.. అన్నట్టుగా ఛాతి నుంచి పైకొచ్చి కొట్టుకుంటోంది. చర్మం పొర కప్పేసే ఉన్నప్పటికీ.. గుండె పైకి రావడం మాత్రం స్పష్టంగా కనిపిస్తోంది.

ఫ్లోరిడాకు చెందిన విర్సావియా అనే అమ్మాయి నవ్వినప్పుడు గుండె ఛాతి నుంచి బయటకు వచ్చి కొట్టుకుంటోంది. అరుదైన వ్యాధి కారణంగా ఇలా జరుగుతోంది. ఇలాంటి స్థితిని పెంటాలజీ ఆఫ్ క్యాంట్రెల్ అంటారు. 55 లక్షల మందిలో ఒకరికి మాత్రమే ఇలాంటి పరిస్థితి ఎదురవుతుంది.

తను అందరిలా ఎక్కువ కాలం బతకడం సాధ్యం కాదని పుట్టినప్పుడే డాక్టర్లు చెప్పేశారు. ఆ చిన్నారి జన్మించినప్పుడు.. పేగులు కూడా బయటకొచ్చాయి. కానీ ఏడేళ్ల విర్సావియా మాత్రం ఇప్పటికైతే బాగానే ఉంది. ఆమెకు చికిత్స అందించడానికి ఓ డాక్టర్ ముందుకొచ్చారు. కానీ హై బీపీ కారణంగా తనకు సర్జరీ చేయడం సాధ్యపడలేదు.