గుడ్డే కాదు.... పెంకుతోనూ ప్రయోజనాలు!

గుడ్డు సంపూర్ణాహారం. శరీరానికి అవసరమైన పోషకాలు దీని ద్వారా లభిస్తాయి. అయితే కొందరు గుడ్డులోని పచ్చసొన తింటే కొవ్వు పేరుకుపోతుందని అపోహ పడతారు. అయితే ఇందులో ఏ మాత్రం నిజం లేదు. కేవలం గుడ్డేకాదు, దాని పెంకుతోనూ అనేక ప్రయోజనాలు ఉన్నాయి. సాధారణంగా గుడ్డు తినేసి పెంకులను బయటపడేస్తాం. దీని వల్ల ప్రయోజనాలు చాలా ఉన్నాయని కొన్ని అధ్యయనాలు తెలియజేస్తున్నాయి. శరీరానికి అవసరమైన క్యాల్షియం దీని ద్వారా లభిస్తుంది. దీంతో ఎముకలు, దంతాలు మరింత గట్టిపడతాయని పరిశోధకులు తెలియజేశారు.

అయితే పెంకులను నేరుగా తీసుకోకుండా, పొడిగా చేసుకుని తినాలి. గుడ్డు పెంకులను పొడిచేసి రోజూ అర టేబుల్ స్పూన్ తీసుకుంటే శరీరానికి అవసరమైన 90 శాతం క్యాల్షియం అందుతుంది. ఎముకలు, దంతాలకు 1000 నుంచి 1500 మిల్లీగ్రాముల క్యాల్షియం అందుతుందని పరిశోధకులు తెలిపారు. ఆధునిక యాంత్రిక జీవనంలో భాగంగా ఎక్కువ సమయంలో ఏసీ గదుల్లోనే గడుపుతున్నారు. ఇలాంటి వారికి డి విటమిన్ లోపం ఏర్పడుతుంది. ఈ విటమిన్ లోపం వల్ల ఎముకలు, దంతాలకు అవసరమైన క్యాల్షియం అందదు. దీంతో త్వరగా అలసిపోవడం, పనిలో చిరాకు, ఒత్తిడి లాంటి సమస్యలు తలెత్తుతాయి. ఇలాంటి వాళ్లు గుడ్డు పెంకు పొడిని నీళ్లు లేదా పాలలో కలుపుకుని తాగితే క్యాల్షియం పుష్కలంగా అందుతుంది.