మొటిమలకు... నిమ్మరసంతో చెక్

ఆధునిక జీవన శైలి కారణంగా అనేక సమస్యలు మనిషిని ఇబ్బంది పెడుతున్నాయి. మొటిమల నుంచి ఒత్తిడి వరకు ఎన్నో సమస్యలు. ఇలాంటి చిన్న చిన్న సమస్యలను చిటికెలో దూరం చేసుకోవచ్చు. వాటన్నింటికి ఒకటే ఔషధం. అదే నిమ్మరసం. నిమ్మరసంలో కనిపించని ఎన్నో మంచి గుణాలు ఉన్నాయి. రోజూ దీనిని తాగడం అలవాటు చేసుకుంటే ఆరోగ్యం మీ నట్టింట్లో తిష్ట వేసుకుని కూర్చున్నట్టే.

బర్గర్లు, పిజ్జాలు, న్యూడిల్స్, బిర్యానీలు... ఇలాంటివి దొరగ్గానే లాగించేస్తాం. మనకి తెలియకుండా బరువు పెరిగిపోతాం. బరువు పెరిగాక ఎలా సన్నబడాలా అని ఆలోచిస్తూ బెంగ పెట్టేసుకుంటాం. బరువు పెరగకుండా ఉండాలంటే భోజనం చేసే ముందు గ్లాసుడు నిమ్మరసం కలిపిన నీళ్లు తాగడం అలవాటు చేసుకోండి. దీనివల్ల కడుపు నిండినట్టు అనిపిస్తుంది. మనకి తెలియకుండా తక్కవ తింటాం. నిమ్మరసం తాగడం వల్ల శరీరం లోపల కూడా శుభ్రమవుతుంది.


అమ్మాయిల్ని వేధించే అతి పెద్ద సమస్య మొటిమలు. ముఖమ్మీద ముత్యమంత మొటిమ కనిపించగానే భూమ్మీద ఉన్న సమస్యలన్నీ తమవే అన్నంత ఫీలైపోతారు అమ్మాయిలు. అంత గాభరా పడాల్సిన అవసరం లేదు. ముఖంపై పేరుకున్న దుమ్ము ధూళిని తరుచూ శుభ్రం చేసుకోవడంతో పాటూ రోజూ గ్లాసుడు నిమ్మరసం కలిపి నీళ్లు తాగండి. నిమ్మలో యాంటీ ఆక్సిడెంట్లు ఉంటాయి. అవి చర్మాన్ని శుభ్రపరుస్తాయి. మొటిమలు రాకుండా అడ్డుకుంటాయి.

యువతను కమ్మేస్తున్న మరో సమస్య ఒత్తిడి. ముఖ్యంగా సాఫ్ట్ వేర్ ఉద్యోగులను మరీ వేధిస్తోంది ఈ సమస్య. రోజూ ఒత్తిడిగా అనిపిస్తుంటే నిమ్మరసాన్ని తరచుగా తాగడం అలవాటు చేసుకోండి. ఉదయాన లేవగానే గోరువెచ్చటి నీళ్లలో నిమ్మరసం కలిపి తీసుకుంటే చాలా మంచిది. నిమ్మలో పుష్కలంగా ఉంటే విటమిన్ సి ఒత్తిడికి చెక్ పెడుతుంది.

చలికాలంలో జలుబు, దగ్గు తీవ్రంగా వేధిస్తుంటాయి. కనుక రోజూ నిమ్మరసం ఏదో ఒక సమయంలో తాగండి. ఇందులో ఉండే విటమిన్ సి రోగనిరోధక శక్తికి అమాంతం పెంచుతుంది. కనుక ఇన్ ఫెక్షన్ల బారిన అంత సులువుగా పడలేరు.