వర్షంలో జుట్టు తడిసిందా.. ఈ చిట్కాలు పాటించండి

జూన్ నెల వచ్చేసింది. రుతుపవనాల రాకతో వర్షాకాలం ప్రారంభమవుతుంది. వర్షాకాలంలో ఏదొక సందర్భంలో జుట్టు తడవడం అందరికీ సాధారణంగా జరుగుతూనే ఉంటుంది. దాని కారణంగా అనేక జుట్టు సమస్యలు వస్తుంటాయి. వాసన రావడం, గడ్డిలా మారడం, చుండ్రు సమస్యలు తలెత్తుతాయి. వీటి కారణంగా జుట్టు రాలుతుంది. ఈ చిట్కాలు పాటిస్తే వర్షాకాలంలో వచ్చే జుట్టు సమస్యల నుంచి బయటపడొచ్చు.

జిడ్డు పోవాలంటే..
వర్షంలో తడిసిన జుట్టు క్రమంగా జిడ్డుగా మారుతుంది. దీన్ని నివారించాలంటే కోడిగుడ్డులోని తెల్లటి సొనలో నిమ్మకాయ రసం, ఉసిరిపొడి కలిపి జుట్టుకు పూతలా వేసుకుని 20 నిమిషాల తర్వాత తలస్నానం చేయాలి. ఇలా చేస్తే జుట్టు ఆరోగ్యంగా, అందంగా.. పట్టుకుచ్చులా మారుతుంది.

పావుకప్పు పెరుగులో కొద్దిగా ఆలివ్‌నూనె, నిమ్మరసం కలిపి తలంతా రాసుకోవాలి. నలభై నిమిషాలయ్యాక షాంపూతో కడిగేయాలి. వర్షంలో తడిసినప్పుడు జుట్టు జిడ్డుగా మారకుండా ఈ చిట్కా పనిచేస్తుంది. వర్షాకాలం మొత్తం వారానికోసారి ఈ పూత వేసుకుంటే ప్రయోజనం ఉంటుంది.

ఎండుగడ్డిలా మారితే...
వర్షంలో తడిసిన జుట్టు గడ్డిలా మారిపోయి చికాకు పెడుతుంది. ఈ సమస్య నుంచి బయటపడాలంటే వారానికోసారి గోరువెచ్చని కొబ్బరినూనెలో నిమ్మరసం, కలబంద గుజ్జు కలపి తలకు పట్టించాలి. గంటసేపటి తర్వాత తలస్నానం చేస్తే క్రమంగా సమస్య తగ్గుతుంది. ఈ చిట్కాతో జుట్టు రాలడం కూడా తగ్గుతుంది.

హెర్బల్ షాంపూ వాడాలి
వర్షాకాలంలో జుట్టు ఎక్కువగా తేమను పీల్చుకుంటుంది. అందువల్ల కచ్చితంగా వారానికి రెండుసార్లు తలస్నానం చేయాలి. రసాయనాలు ఉండే షాంపూలు కాకుండా హెర్బల్ షాంపూను వినియోగిస్తే మంచిది.