gastric problem: గ్యాస్‌ ట్రబుల్‌ ఎక్కువగా ఉందా..? ఈ క్యాన్సర్‌ కావచ్చు జాగ్రత్త..!

గ్యాస్‌ ట్రబుల్‌.. ఇది చాలా మంది ఎదుర్కొనే సమస్యే. గాడితప్పిన ఆహారపు అలవాట్లు, అస్తవ్యస్థమైన జీవనశైలి, ఒత్తిడి, నిద్రలేమ వంటి కారణాల వల్ల ఈ సమస్య ఎదురవుతుంది. ఆహారం ఎక్కువగా తిన్నా, మలబద్ధకం ఉన్నా, నెలసరి సమయంలోనూ గ్యాస్‌ ట్రబుల్‌ ఇబ్బంది పెడుతూ ఉంటుంది. కొంతమంది అస్తమానం ఈ సమస్యతో బాధపడుతూ ఉంటారు. సాధారణ గ్యాస్‌ ట్రబుల్‌ అని నిర్లక్ష్యం వహిస్తారు. కానీ, తీవ్రమైన ఆరోగ్య సమస్యల కారణంగానూ.. గ్యాస్‌ సమస్య ఇబ్బంది పెడుతుందని నిపుణులు చెబుతున్నారు. కొన్ని అనారోగ్యాల కారణంగా.. కడుపు, పేగులు ఎఫెక్ట్‌ అవుతాయి.. దీని వల్ల జీర్ణ సమస్యలకు వచ్చే అవకాశం ఉంది. మీరు ఎక్కువగా గ్యాస్‌తో ఇబ్బంది పడుతుంటే.. లైట్‌గా తీసుకోకూడదని నిపుణులు హెచ్చరిస్తున్నారు.

స్లీప్ అప్నియా..
నేషనల్ లైబ్రరీ ఆఫ్ మెడిసిన్‌ నివేదిక ప్రకారం, స్లీప్ అప్నియా ఉన్న వ్యక్తులు తరచుగా నోటి ద్వారా శ్వాస తీసుకుంటారు, గురక పెట్టేటప్పుడు గాలిని మింగేస్తారు. మీకు స్లీప్‌ అప్నియా ఉంటే.. రాత్రి నిద్రలో గాలి మింగుతూ ఉంటే.. తరచుగా గ్యాస్‌ సమస్య ఇబ్బంది పెట్టే అవకాశం ఉంది. మీరు డాక్టర్‌ను కలవడం మేలు. ఈ సమస్యను నిర్లక్ష్యం చేయడం మంచిది కాదు.
పెద్దపేగు క్యాన్సర్..
పెద్దపేగు క్యాన్సర్‌, గ్యాస్ట్రిక్‌ సమస్య మధ్య సంబంధం ఉందని నిపుణులు చెబుతున్నారు. పెద్దపేగు క్యాన్సర్‌లో‌ గ్యాస్ట్రిక్‌, తిమ్మిర్‌, కడుపు ఉబ్బరం, పొత్తి కడుపు నొప్పి, మలంలో రక్తం వంటి లక్షణాలు కనిపిస్తాయి. మీకు తరచుగా కడుపు నొప్పి, గ్యాస్‌ ట్రబుల్‌, ఉబ్బరం అనిపిస్తే వెంటనే డాక్టర్‌ దగ్గరకు వెళ్లడం మంచిది. చాలా మంది ఈ లక్షణాలను నిర్లక్ష్యం చేస్తారు.
IBS..
ఇరిటేటబుల్‌ బౌల్‌ సిండ్రోమ్‌ కారణంగానూ గ్యాస్ట్రక్‌ సమస్య వచ్చే అవకాశం ఉంది. ఇరిటేటబుల్‌ బౌల్‌ సిండ్రోమ్‌ వల్ల పొత్తికడుపులో నొప్పి, అతిసారం, మలబద్ధకం, కడుపు ఉబ్బరం వంటి సమస్యలు వస్తాయి. IBS కారణంగా జీర్ణ సమస్యలు తలెత్తుతాయి. IBS ఉన్న వ్యక్తి గ్యాస్‌ ట్రబుల్‌తో ఇబ్బంది పడతారు. మీమ్మల్ని గ్యాస్‌ సమస్య ఇబ్బంది పెడుతుంటే.. డాక్టర్‌ను కలవడం మేలు.
డైవర్టిక్యులోసిస్ వ్యాధి
డైవర్టిక్యులోసిస్ సమస్యలో కడుపు ఉబ్బరం, గ్యాస్ట్రిక్‌, అతిసారం, కడుపు నొప్పి, మలబద్ధకం వంటి లక్షణాలు ఉంటాయి. డైవర్టిక్యులోసిస్ వ్యాధితో బాధపడేవారు తరచూ కడుపు అసౌకర్యంగా ఉండటం, గ్యాస్ట్రిక్‌ సమస్యలు ఇబ్బంది పెడుతూ ఉంటాయి.
హైపోథైరాయిడిజం..
హైపోథైరాయిడిజం కారణంగానూ కొన్నిసార్లు జీర్ణ సమస్యలు తలెత్తుతాయి. హైపోథైరాయిడిజం జీర్ణక్రియ మందగిస్తుంది. దీని వల్ల.. గుండెల్లో మంట, మలబద్ధకం, గ్యాస్‌ ట్రబులు వంటివి ఎక్కువగా ఉంటాయి.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.