International Yoga Day Benefits And Purpose Of Yoga
Yoga Day 2020: వారేవ్వా యోగా.. ఇలా చేస్తే ఆరోగ్యం మస్త్!
నిత్యం యోగం చేయడం వల్ల కలిగే ఈ ప్రయోజనాలు గురించి తెలిస్తే.. ఈ రోజు నుంచే మొదలు పెడతారు.
Samayam Telugu21 Jun 2020, 12:20 am
యోగా.. ప్రపంచానికి ఇండియా అందించి విలువైన వరం. శారీరక, మానసిక ఆరోగ్యం అందించే యోగా వేదకాలం నుంచే భారతదేశంలో అమల్లో ఉంది. 1863-1902 కాలంలో స్వామి వివేకానంద పశ్చిమ దేశాలకు యోగాను పరిచయం చేశారు. యోగాలోని ఆరోగ్య ప్రయోజనాలు ప్రపంచవ్యాప్తం చేయాలనే ఉద్దేశంతో నరేంద్ర మోదీ ప్రభుత్వం సూచనతో ఐక్యరాజ్య సమితి జూన్ 21ని ‘అంతర్జాతీయ యోగా డే’గా ప్రకటించింది. ఈ రోజు ప్రపంచవ్యాప్తంగా 190కి పైగా దేశాల్లో కోట్లాది మంది యోగా చేస్తారంటే.. ‘యోగా డే’కు ఎంత క్రేజ్ ఉందో అర్థం చేసుకోవచ్చు. ఈ నేపథ్యంలో యోగా వల్ల కలిగే ప్రయోజనాలు.. ఏ విధంగా చేయాలి? తదితర వివరాలను తెలుసుకుందాం.
యోగా చేసే ముందు ఆహారం తీసుకోవచ్చా?
ఆహారాన్ని తీసుకున్న తర్వాత యోగా అస్సలు చేయకూడదు. అందుకే, ఎక్కువ మంది ఉదయాన్నే లేచి పరగడపున యోగా చేస్తారు. ఒక వేళ మీరు ఆహారం తీసుకున్నట్లయితే.. రెండు గంటల తర్వాతే యోగాసనాలు వేయాలి. తిన్న వెంటనే యోగా చేస్తే జీర్ణ సమస్య ఏర్పడతాయి. ఆకలిగా ఉన్నటయితే.. చిన్న పండు తిని, అరగంట తర్వాతైన యోగా చేయొచ్చు. ఆసనాలకు ఓ అరగంట ముందు చిన్న గ్లాసు నీరు తాగొచ్చు. యోగా చేస్తున్న సమయంలో దాహం వేస్తే మధ్య మధ్యలో కొంత నీరు తాగొచ్చు.
ఎలా మొదలు పెట్టాలి?
వ్యాయమం చేయడానికి ముందు వార్మప్ చేసినట్లే.. యోగాను కూడా నెమ్మదిగా మొదలుపెట్టాలి. శ్వాస ప్రక్రియలు.. అంటే గాలిని లోపలికి పీల్చుతూ బయటకు వదలడం, ప్రాణాయామంతో యోగాను ఆరంభించాలి. దీని వల్ల మీరు ఎక్కువ సేపు యోగా చేయొచ్చు. ప్రాణాయామంలో శ్వాసపై ధ్యాస పెట్టండి. ఇలా చేయడం వల్ల ఆసనాలన్నీ అలుపు లేకుండా చురుగ్గా చేయొచ్చు.
ప్రశాంతమైన ప్రదేశంలో..
మీరు యోగా చేసే ప్రాంతం ప్రశాంతంగా ఉండేలా చూసుకోండి. నిశబ్దమైన ప్రదేశంలో యోగా చేయడం మంచిది. మనసును కూడా ఎంతో ప్రశాంతంగా ఉంచుకుని కేవలం శ్వాస మీదే ధ్యాస పెడుతూ నెమ్మదిగా ఆసనాలు వేయాలి. ఎవరో తొందర పెడుతున్నట్లుగా ఆసనాలు వేయడం వల్ల ఫలితం ఉండదు. యోగా చివరిలో ప్రశాంతంగా శవాసనం వేయాలి. దీనివల్ల శరీరం రిలాక్స్గా ఉండటమే కాకుండా మనసు కూడా ప్రశాంతంగా ఉంటుంది.
వాయిదాలు వేయొద్దు
యోగా విషయంలో చాలామంది ఆరంభ సూరత్వం ప్రదర్శిస్తారు. ఆ తీరు నుంచి బయటపడి రోజూ యోగా చేయడానికి ప్రయత్నించండి. ఎందుకంటే క్రమం తప్పకుండా యోగాసనాలు వేస్తేనే.. ఫలితాలు మీకు కనిపిస్తాయి. లేకుంటే.. ఆరోగ్య ప్రయోజనాలు కూడా ‘వాయిదా’ పడతాయి.
నిపుణుల సూచనలతో యోగాసనాలు వేయండి
యోగాను ఎలాపడిలే అలా చేసేయకుండా.. ఒక క్రమపద్ధతిలో చేయండి. మీకు అవగాహన లేనట్లయితే యోగా గురువుల వద్ద శిక్షణ పొందండి. ఇటీవల మనకు కావల్సినవన్నీ ఆన్లైన్లో దొరుకుతున్నాయి. యూట్యూబ్ లేదా ఏదైనా యాప్స్లో ఇప్పుడు యోగాసనాల వీడియోలు అందుబాటులో ఉంటున్నాయి. వాటిని చూసి కూడా మీరు సాధన చేయొచ్చు. అనారోగ్యంతో ఉన్నప్పుడు యోగాసనాలు వేయొద్దు. దగ్గు, జ్వరం, నీరసం, తలనొప్పి ఉన్నప్పుడు ఆసనాలు వేయొద్దు.
యోగా చేయడం వల్ల లాభాలివే
✺ యోగా వల్ల శారీరకంగా, మానసికంగా ధృఢంగా మారతాం.
✺ శ్వాసక్రియలో ఇబ్బందులు తొలగిపోతాయి.
✺ తలనొప్పి, మైగ్రేన్ అంటే పార్శపు నొప్పి తగ్గి పోతుంది.
✺ జీర్ణ సమస్యలు కూడా దరిచేరవు.
✺ కంప్యూటర్ వర్క్ చేసేవారు మెడనొప్పు, వెన్ను నొప్పి, తలనొప్పులతో బాధపడతారు. అలాంటి వారు కొన్ని ఆసనాలు వేయడం వల్ల అలాంటి సమస్యలు అన్నింటినీ దూరం చేసుకోవచ్చు.
✺ మోకాళ్ల నొప్పులు, శరీరాన్ని ఇబ్బంది పెట్టే మరికొన్ని కూడా దూరం అవుతాయి.
✺ ఏకాగ్రత పెరుగుతుంది. జ్ఞాపక శక్తి, గ్రహణశక్తి పెరుగుతుంది.
✺ ఆత్మవిశ్వాసం, స్వీయ క్రమశిక్షణ అలవడతాయి.
✺ భావోద్వేగాలు నియంత్రణలో ఉంటాయి.
✺ యోగాభ్యాసం ద్వారా శరీరంలో ఆక్సిజన్తో కూడిన రక్తం శరీరమంతా విస్తరిస్తుంది.
✺ యోగా చేస్తున్నప్పుడు ఆరోగ్యానికి మేలు చేసే హార్మోన్లు విడుదల అవుతాయి.
✺ కొవ్వు నిల్వలు సమతుల్యంగా ఉంటాయి. ✺ బరువు తగ్గుతారు.
✺ రోగ నిరోధక శక్తి పెరుగుతుంది.
✺ సైనస్, ఎలర్జీ సమస్యలు దూరం అవుతాయి.
✺ వృద్ధాప్య ఛాయలు దూరమై యవ్వనంగా కనిపిస్తారు.
✺ శరీరం రిలాక్స్ అవ్వడం వల్ల నిద్రలేమి సమస్యలు దూరం అవుతాయి.
✺ కంటి సమస్యలు, మిగతా ఆరోగ్య సమస్యలు కూడా తగ్గుతాయి.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.