Pregnancy problems: ప్రెగ్నెన్సీ సమయంలో ముక్కు నుంచి రక్తం వస్తే ప్రమాదమా..?

గర్భదారణ సమయంలో మహిళలను చాలా సమస్యలు ఇబ్బంది పెడుతూ ఉంటాయి. మూడ్‌ స్వింగ్స్‌, మార్నింగ్‌ సిక్నెస్‌, ఒళ్లు నొప్పులు వంటి సమస్యలు భరించాల్సి ఉంటుంది. గర్భిణులకు కొన్నిసార్లు ముక్కు నుంచి రక్తం కారుతూ ఉంటుంది, దీన్నే ఎపిస్టాక్సిస్ అంటారు. ఈ లక్షణం ఐదుగురు మహిళలలో ఒకరిలో కనిపిస్తుంది. ముక్కు నుంచి రక్తం కారడం వల్ల బిడ్డకు, తల్లికి ఎలాంటి ప్రమాదం ఉండదు. నేషనల్ హెల్త్ సర్వీసెస్ ప్రకారం, గర్భిణీ స్త్రీలలో తీవ్రమైన రక్తస్రావం చాలా అరుదుగా జరుగుతుందని, కడుపులో పిండంపై ప్రభావం చూపదు. కానీ రక్తం ఎక్కువగా వస్తూ ఉంటే జాగ్రత్తలు పాటించాల్సి ఉంటుంది, టైమ్‌కు ట్రీట్మెంట్‌ తీసుకోవాలి.

ఎందుకు రక్తం వస్తుంది..
గర్భదారణ సమయంలో ముక్కు నుంచి రక్తం రావడానికి చాలా కారణాలు ఉంటాయి. గర్భిణుల శరీరంలో రక్త ప్రసరణ వేగంగా జరుగుతుంది, ముఖ్యంగా మొదటి మూడు నెలల్లో రక్తం పరిమాణం 50 శాతం పెరుగుతుంది. దీనివల్ల రక్తనాళులు వెడల్పు అవుతాయి. ముక్కు రంధ్రాల వద్ద రక్తనాళాలు చిన్నగా ఉంటాయి. రక్త ప్రసరణ వేగంగా జరిగినప్పుడు.. ప్రెషర్‌ కారణంగా రక్త నాళాలు పగిలి వాటి నుంచి రక్తస్రావం అవుతుంది.
ఈస్ట్రోజెన్, ప్రొజెస్టెరాన్ హార్మోన్ల స్థాయిలలో మార్పులు కారణంగా ముక్కు నుంచి రక్తం వచ్చే అవకాశం ఉందని నిపుణులు చెబుతున్నారు. ప్లాసెంటల్ గ్రోత్ హార్మోన్, రోగనిరోధక మార్పుల వల్ల కూడా ముక్కు నుంచి రక్తం కారే అవకాశం ఉందని బెంగళూరులోని జీవోత్తమ ఆయుర్వేద కేంద్రం డాక్టర్‌ శరద్‌ కులకర్ణి (MS (Ayurveda), (Ph.D.)) అన్నారు. గర్భదారణ సమయంలో ఎప్పుడైనా ముక్కు నుంచి రక్తం కారే అవకాశం ఉందని డా. శరద్‌ కులకర్ణి చెప్పారు. నిద్ర సమయంలోనూ ఇది జరిగే అవకాశం ఉందన్నారు. రక్తస్రావం కొన్ని సెకన్ల నుంచి 10 నిమిషాలు మించి జరిగవచ్చు.
ఎలా ఆపాలి..?

• ముక్కు నుంచి రక్తం వస్తున్నప్పుడు, ఈ జాగ్రత్తలు పాటిస్తే వెంటనే తగ్గుతుంది.
• నిటారుగా నిలబడి లేదా పడుకుని, తలను పైకి లేపండి.
• నోటి నుంచి శ్వాస తీసుకుంటూ.. 10 నుంచి 15 నిమిషాల పాటు ముక్కు రంధ్రాలపై ఒత్తిడి పెట్టండి.
• తల తిరిగినట్లు అనిపిస్తే.. సాధారణ స్థితికి రండి

డాక్టర్‌ టిప్‌..

ముక్కు నుంచి రక్తం కారుతుంటే.. 1,2 చుక్కల ఉల్లిపాయ రసాన్ని ముక్కులో వేసుకుంటే రక్తస్రావం ఆగుతుందని డా. శరద్ అన్నారు.
తడి ఇటుకను వాసన చూసినా.. ముక్కు నుంచి రక్తస్రావం జరగడం తగ్గుతుంది.
దూర్వా రసాన్ని ముక్కులో వేసుకున్నా రక్తస్రావం తగ్గుతుంది.
డాక్టర్‌ను ఎప్పుడు సంప్రదించాలి..?
ముక్కు నుంచి ఎక్కువగా, తరచుగా రక్తం వస్తూ ఉంటే, శ్వాస తీసుకోవడంలో ఇబ్బంది, మైకం, జ్వరం, చలి వంటి సమస్యలు ఇబ్బంది పెడితే డాక్టర్‌ దగ్గరకు వెళ్లడం మంచిది.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.