johnson Baby Powderలో కేన్సర్ కారక ఆస్బెస్టాస్.. దశాబ్దాలుగా తెలిసినా..!

జాన్సన్ అండ్ జాన్సన్ ఉత్పత్తులకు ప్రపంచ వ్యాప్తంగా మంచి గిరాకీ ఉంది. కానీ జాన్సన్ బేబీ టాల్కమ్ పౌడర్ వాడటం వల్ల కేన్సర్ బారిన పడ్డామని ఆరోపిస్తూ చాలా మంది న్యాయస్థానాలను ఆశ్రయిస్తున్నారు. దీంతో జాన్సన్ అండ్ జాన్సన్ ఉత్పత్తుల నాణ్యత, స్వచ్ఛతపై అనుమానాలు తలెత్తుతున్నాయి. ఇలాంటి తరుణంలో జాన్సన్ బేబీ టాల్కమ్ పౌడర్‌లో ఆస్బెస్టాస్ అవశేషాలు ఉన్న విషయం ఆ సంస్థకు దశాబ్దాలుగా తెలుసని రాయిటర్స్ కథనాన్ని వెల్లడించింది. ఈ ఆస్బెస్టాస్ అవశేషాలు కేన్సర్ కారకమని తెలిసినా ఆ సంస్థ నోరు మెదపకుండా ఉందని ఆరోపించింది.

రాయిటర్స్ కథనంతో జాన్సన్ అండ్ జాన్సన్ కంపెనీ షేర్లు 8.3 శాతం మేర పడిపోయాయి. ఆ సంస్థ 30 బిలియన్ డాలర్లు నష్టపోయింది. కాగా, తమ బేబీ పౌడర్‌లో ఆస్బెస్టాస్ అవశేషాలు లేవని ఆ సంస్థ తెలిపింది.

జాన్సన్ బేబీ టాల్కమ్ ఉత్పత్తులోని ఆస్బెస్టాస్ ఫైబర్లు ఒవేరియన్ కేన్సర్‌కు దారి తీస్తున్నాయని 2017 సెప్టెంబర్లోనే బ్లూమ్‌బర్గ్ న్యూస్ కథనాన్ని ప్రచురించింది.