సంతోషంగా వుంటే లైఫ్ లాంగ్ బతుకుతారట!

ఆరోగ్యమే మహా భాగ్యం అన్నదాంట్లో ఎంత సత్యం వుందో... ఆనందమే మహా భాగ్యం అనేదాంట్లోనూ అంతే నిజం వుందంటున్నాయి తాజా అధ్యయనాలు. ఎంత సంతోషంగా వుంటే అంత ఎక్కువ కాలం బతుకుతారని ఓ తాజా అధ్యయనం స్పష్టంచేస్తోంది. ఉత్సాహంగా వుండటం, సంతోషంతో జీవించడం, ప్రశాంతమైన జీవితాన్ని గడిపేవారి ఆయుష్షు సాధారణ వ్యక్తులకన్నా అధికం వుంటుందని ఈ స్టడీ పేర్కొంది.

ఎక్కువ రకాలుగా సంతోషంగా వుండేవారికి అనారోగ్యం దరిచేరదని తాము జరిపిన అధ్యయనంలో తేలింది అని స్పష్టంచేశారు అమెరికాలోని కార్నెల్ యూనివర్శిటీకి చెందిన పరిశోధకులు. సంతోషంగా లేనివారు అనారోగ్యంబారిన పడటం కారణంగా సంతోషంగా వున్న వారికన్నా ముందే ఆయుష్షుని కోల్పోతారు అని ఈ అధ్యయనంలో పాల్గొన్న పరిశోధకులు చెబుతున్నారు.

40 ఏళ్ల నుంచి 65 ఏళ్ల వయస్సు వున్న 175 మందిపై 30 రోజులపాటు అధ్యయనం జరిపారు. ప్రతీరోజు సాయంత్రం వారు అనుభవించిన 16 రకాల ఎమోషన్స్‌ని నమోదు చేశారు. ఆ తర్వాత ఆరు నెలలకి వారి రక్త నమూనాలని సేకరించి పరీక్షించిన అనంతరం పరిశోధకులు ఈ ఫలితాన్ని తేల్చారు.