కారం ఎక్కువగా తింటున్నారా? మీకో గుడ్ న్యూస్

మీకు కారం ఎక్కువగా తినడం అలవాటా? మీకో గుడ్ న్యూస్.. కారం ఎక్కువగా తీసుకునేవారిలో గుండె జబ్బుల కారణంగా సంభవించే మరణాలు తక్కువగా నమోదు అవుతున్నట్లు యూనివర్సిటీ ఆఫ్ వెర్మాంట్ పరిశోధనలో వెల్లడైంది. మిరపకాయ కారాన్ని ఎక్కువగా తీసుకోవడం వల్ల మరణాల రేటు తక్కువగా నమోదు అవుతున్న విషయాన్ని చైనాకు చెందిన ఓ అధ్యయనం కూడా నిర్ధారించింది. మిరప కారం ఎక్కువగా తీసుకునే 16 వేల మంది అమెరికన్లపై ఎన్‌హెచ్ఈఎస్ 23 ఏళ్లపాటు చేపట్టిన సర్వే ఆధారంగా యూనివర్సిటీ ఆఫ్ వెర్మాంట్ ఈ వివరాలను వెల్లడించింది. పిన్నవయస్కులు, వివాహితులు, సిగరెట్, ఆల్కహాల్ తాగేవారు, చదువుకోనివారు ఇలా వివిధ వర్గాలకు చెందిన ప్రజలపై ఆ వర్సిటీ అధ్యయనం చేపట్టింది.

మిరప కాయల్లో ఉండే క్యాప్సికిన్ అనే ప్రధాన పదార్థం ఒబేసిటీని తగ్గించడంతోపాటు రక్తనాళాల్లో రక్తసరఫరాను మెరుగుపరుస్తుందని.. ఫలితంగా గుండె జబ్బుల ముప్పు తగ్గుతుందని పరిశోధనలో వెల్లడైంది. కారం లేదా స్పైసీ ఫుడ్‌ను ఆహారంలో కాస్త ఎక్కువ మోతాదులో తీసుకోవాలని పరిశోధకులు సూచిస్తున్నారు. ఈ అంశంపై మరింత లోతుగా పరిశోధనలు జరుపుతున్నారు.