పట్టణాల్లో నివసిస్తే గజినీలు అయిపోతారట!

కొంత మంది ఏదో పని మీద బయటకు వెళ్తారు. ఆ పని తప్ప మిగతా పనులన్నీ చేసుకుని వస్తారు. తీరా ఇంటికి వచ్చాక అసలు పని గుర్తుకొచ్చి నాలుక కరుచుకుంటారు. ఇదేదో మామోలు మతిమరుపు అనుకుంటే పొరపాటే. రానున్న రోజుల్లో పట్టణ ప్రజలను పీడకలలా వెంటాడే రోగంలా మారిపోతుందట. దీన్నే బీజీ లైఫ్‌స్టైల్ సిండ్రోమ్ (బీఎల్ఎస్) అని అంటారు. రోజు చేయాల్సిన పనులను మరిచిపోవడం, మనుషులను గుర్తుపట్టలేకపోవడం, ఏదో గుర్తుకు వస్తున్నట్లే గుర్తుకు వచ్చి మళ్లీ మరిచిపోవడం.. అంటే ‘భలే భలే మగాడివోయ్’ చిత్రంలో నానిలా మారిపోవడం అన్నమాట..

ఈ సమస్య పెద్ద నగరాలు, పట్టణాల్లోనే ఎక్కువగా ఉందని సర్వేలు చెబుతున్నాయి. తీవ్రమైన ఒత్తిడి, ఆందోళనల వల్ల పట్టణవాసుల మతి స్థిమితం కోల్పుతున్నారని తెలుపుతున్నాయి. అసిబడెమ్ హాస్పిటల్స్‌కు చెందిన న్యూరాలజీ విభాగం నిపుణులు డాక్టర్ నెర్గిజ్ తెలిపిన వివరాల ప్రకారం.. పని ఒత్తిడి, డిప్రషన్, ఏకాగ్రత కోల్పవడం వంటివి బీఎల్ఎస్‌కు కారణం అవుతుందని, ఈ పరిస్థితి పట్టణవాసుల్లోనే ఎక్కువగా ఉన్నట్లు గుర్తించామని తెలిపారు.

అల్జీమర్స్ లేదా పార్కిన్సన్ వ్యాధులు కలిగినవారిలో జ్ఞాపకశక్తిన తక్కువగా ఉంటుందని, పరిసరాల ప్రభావం కూడా ఈ పరిస్థితికి దారి తీస్తోందని నెర్గిజ్ పేర్కొన్నారు. తమ వద్దకు వచ్చే రోగుల్లో చాలా మంది ఎదుటి వ్యక్తిని గుర్తించలేకపోతున్నామని, ఒకే ప్రశ్నను పదే పదే అడుగుతున్నామని తెలుపుతుంటారని అన్నారు. పురుషులతో పోల్చితే మహిళల్లో ఈ సమస్య చాలా తక్కువగా ఉందన్నారు. అయితే, డిప్రషన్లో ఉన్న మహిళల్లో సైతం మతిమరుపు ఎక్కువగా ఉన్నట్లు గుర్తించామని తెలిపారు. కంటి నిండ కునుకు, దూమపానానికి దూరంగా ఉండటం, విటమిన్లతో కూడిన సమతుల్య ఆహారాన్ని తీసుకోవడం ద్వారా ఈ సమస్య నుంచి బయట పడవచ్చని వివరించారు.