త్వరలో మగవాళ్లకు కుటుంబ నియంత్రణ ఔషధాలు!!

ఇప్పటి వరకు మహిళలకు మాత్రమే పరిమితమైన కుటుంబ నియంత్రణ ఔషధాలు పురుషులకు కూడా అందుబాటులోకి వచ్చే రోజులు దగ్గర్లోనే ఉన్నాయి. పురుషుల గర్భ నిరోధక ఔషధాలు తయారీకి మార్గం సుగమమైంది. ఆఫ్రికా అడవుల్లో అరుదుగా కనిపించే ఓ రకం మొక్కలో లభ్యమయ్యే పదార్థం ద్వారా ఈ ఔషధాలను తయారు చేయవచ్చని పరిశోధకులు గుర్తించారు. అకోకాంతెర షింపేరి, స్రొఫాంతస్ గ్రాటన్ అనే మొక్కల్లో లభ్యమయ్యే ‘వొవాబైన్’ అనే విషపదార్థం ద్వారా పురుషుల కోసం కుటుంబ నియంత్రణ మాత్రలను రూపొందించనున్నారు. ఈ మొక్కల్లోని విషాన్ని స్వల్ప మోతాదులో ఉపయోగించడం ద్వారా పురుష గర్భనిరోధక ఔషధాన్ని తయారు చేయవచ్చని గుర్తించినట్లు అమెరికన్ కెమికల్ సొసైటీ శాస్త్రవేత్తల బృందం తెలిపింది.

ఆఫ్రికా అడవుల్లో వేటకు వెళ్లేవారు ప్రస్తుతం గుర్తించిన మొక్కల్లోని రసాయానాన్ని తమ బాణాలకు పూసి ఉపయోగిస్తుంటారు. ఈ రసాయం కలిగిన బాణాలు జంతువుల శరీరానికి తగిలిన మరుక్షణమే అందులోని విషం శరీరంలోకి వ్యాపించి ప్రాణాలను హరిస్తుంది. అయితే ఈ విషాన్ని అత్యల్పస్థాయిలో వాడడం వల్ల ప్రయోజనం ఉంటుందని పరిశోధకులు తెలియజేశారు. ఈ పదార్థం పురుషుల్లోని శుక్ర కణాలను అచేతనం చేస్తుందని గుర్తించారు. ఎలుకలపై చేసిన ప్రయోగాలు విజయవంతం కావడంతో ఇకపై పురుషుల కోసం గర్భనిరోధక ఔషధాలను అందుబాటులోకి తీసుకురావడానికి ప్రయత్నిస్తున్నారు.

విషపూరితమైన వొవాబైన్‌కు కొన్ని మాంసకృత్తులను జోడించడం ద్వారా ఎలుకల్లో చేసిన ప్రయోగం విజయవంతమైనట్టు శాస్త్రవేత్తలు తెలిపారు. దీని వల్ల వీర్య కణాలు బలహీనపడి అండాశయం వైపు కదలిక ఆగిపోయినట్లు వివరించారు. ఈ పరిశోధన వివరాలను ఏసీఎస్ జర్నల్ ఆఫ్ మెడికల్ కెమిస్ట్రీలో ప్రచురించారు. శరీరంలోని సహజసిద్దమైన వొవాబైన్ స్రావకాల వల్ల రక్తపోటును నియంత్రిస్తుంది. గుండె జబ్బుల రోగులకు చికిత్సలో దీన్ని ఉపయోగిస్తారు. పరిశోధన నివేదిక ప్రకారం వొవాబైన్‌‌లోని సోడియం, కాల్షియం అయాన్లు సంతానోత్పత్తికి ఉపయోగపడే ప్రోటీన్ నిర్వీర్యం చేస్తాయి. దీంతో పురుషుల్లో వీర్యకణాల చలనం మెల్లగా ఉంటుంది. అయితే దీన్ని అధిక మోతాదులో తీసుకుంటే మాత్రం గుండె పనితీరుపై తీవ్ర ప్రభావం చూపుతుందని శాస్త్రవేత్తలు హెచ్చరిస్తున్నారు.