ఉల్లి రసాన్ని మాడుకు పట్టిస్తే ఏమవుతుంది?

ప్రస్తుతం చాలా మందిని వేధించే సమస్య జుట్టు రాలడం. తీవ్ర ఒత్తిడి, మారిన జీవన విధానం వల్ల చాలా మందికి చిన్న వయసులోనే జుట్టు రాలిపోతోంది. జుట్టు రాలడాన్ని అరికట్టడం కోసం, తల మీద వెంట్రుకలు వేగంగా పెరగడం కోసం ఉల్లిపాయ రసం అద్భుతంగా ఉపయోగపడుతుంది. ఇందుకోసం ఏం చేయాలంటే..
ఓ ఎర్రటి ఉల్లిపాయను తీసుకొని పెద్ద పెద్ద ముక్కలుగా కట్ చేయాలి. తర్వాత వాటిని మిక్సీలో వేసి జ్యూస్‌లా చేయాలి. ఓ క్లాత్ సాయంతో దాన్ని వడగట్టి రసాన్ని చిన్న గిన్నెలోకి తీసుకోవాలి. ఆ రసంలో దూది ముంచి జుట్టును పాయలు, పాయలుగా విడదీస్తూ మాడుకు రాయాలి. ఇలా చేయడం కోసం దూదిని మాత్రమే ఉపయోగించాలి. అదేవిధంగా ఉల్లిపాయ రసాన్ని మాడుకు మాత్రమే పట్టించాలి. జుట్టుకు అవసరం లేదు. అలా రాసిన ఓ అరగంట తర్వాత గోరువెచ్చని నీటితో తలస్నానం చేయాలి. వారానికి రెండు సార్లు ఇలా చేయడం వల్ల చక్కటి ఫలితం ఉంటుంది. జుట్టు రాలడం తగ్గడంతోపాటు చుండ్రు కూడా తగ్గుతుంది. ఉల్లి రసాన్ని మాడుకు పట్టించడం వల్ల రక్త ప్రసరణ పెరిగి, కురులకు శక్తి లభిస్తుంది. ఆడవాళ్లు ఉల్లిపాయ జ్యూస్‌ను జుట్టుకు ప్యాక్‌లా వేసుకోవచ్చు. దీని వల్ల వారి జుట్టు నిగనిగగలాడుతుంది.