Open Area Yoga or Indoor Yoga: యోగా ఇంట్లో చేస్తే మంచిదా..? బయటనా..?

Open Area Yoga or Indoor Yoga: కరోనా మహమ్మారి కారణంగా.. అందరకీ ఆరోగ్యంపై శ్రద్ధ పెరిగింది. ఆరోగ్యాన్ని కాపాడుకోవడానికి పోషకాహారం, వ్యాయమాలు , యోగాపై దృష్టి పెడుతున్నారు. చాలామంది తాము చేసే రోజువారీ వ్యాయామాల్లో భాగంగా యోగాను చేర్చుకుంటున్నారు. యోగా రాని వారు కూడా ఇంటర్‌నెట్‌లో వెతికి మరీ యోగా సాధన చేస్తున్నారు. యోగా శరీరాన్ని బలోపేతం చేయటంతో పాటు మానసిక ప్రశాంతతనూ కలిగిస్తుంది. కొంతమంది ఓపెన్ ప్లేస్‌లో యోగా చేయడానికి ఇష్టపడుతుంటారు, మరికొందరు ఇంట్లోనే‌ యోగా ప్రాక్టిస్‌ చేస్తుంటారు. అయితే ఈ రెండిటిలో ఏ పద్ధతి మంచిదో.. మీకు తెలుసా. ఫిట్‌నెస్ నిపుణుడు, గ్రావోలైట్ డైరెక్టర్ వైభవ్ సోమనీ దీని గురించి మనకు వివరించారు.
ఓపెన్‌ ప్లేస్‌లో యోగా..

బహిరంగ ప్రదేశంలో యోగా చేయడం, ప్రకృతిలో స్నేహం చేయడం లాంటిది. మీరు ఓపెన్‌ ప్లేస్‌లో యోగా చేస్తే.. గాలి, సూర్యుడు, ఇసుక, నీరుతో సంబంధం పెరుగుతుందని వైభవ్‌ సోమనీ అన్నారు.
ఈ లాభాలు ఉంటాయ్..
బహిరంగ ప్రదేశంలో యోగా చేయడం వల్ల తగినంత ఆక్సిజన్ అందుతుంది.
స్థలం కొరత ఉండదు, ఎవరైనా ఇష్టమైన యోగా ఆసనం చేయవచ్చు.
గుండె పనితీరు మెరుగుపడుతుంది.
గడ్డి, నేలపై పాదాలు, చేతులు తగలడం వల్ల మానసిక ప్రశాంతత లభిస్తుంది.
ఇంట్లో యోగా చేస్తే..

బిజీగా ఉండటం, నిద్ర లేకపోవడం, సమయం లేకపోవడం వంటి కారణాలు వల్ల చాలా మంది ఇంట్లో యోగా చేస్తూ ఉంటారు. ఇంట్లో యోగా చేయడం ద్వారా క్రమబద్ధతను నిర్ధారించుకోవచ్చు.
లాభాలు..
ఇంట్లో యోగా అనేది అంతర్ముఖులకు(introverts) గొప్ప ఎంపిక.
బహిరంగ ప్రదేశాల్లో కొన్ని యోగాసనాలు వేయడానికి సంకోచంగా ఉంటుంది.
నిర్భయంగా, అడ్డంకులు లేకుండా ధ్యానం చేయవచ్చు.
ఏది బెస్ట్‌ ఆప్షన్‌..

బహిరంగ ప్రదేశంలో యోగా చేసినా, ఇంట్లో యోగా చేసినా పర్వాలేదు. కానీ, మీరు యోగా ప్రాక్టిస్‌ చేసేప్పుడు.. ఎక్కువ శ్రద్ధ పెట్టాలి. మీకు నచ్చిన విధంగా యోగా చేయండి.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.