Cervical cancer
NCBI నివేదిక ప్రకారం, భారతదేశంలో ప్రతి 53 మంది మహిళల్లో ఒకరికి గర్భాశయ ముఖద్వార క్యాన్సర్ ఉంది. మన దేశంలో 100 మంది మహిళల్లో ఒకరు ఈ క్యాన్సర్‌తో బాధపడుతున్నారు. 30 నుంచి 69 ఏళ్ల మధ్య వయసున్న మహిళల మరణాల్లో 17 శాతం దీని కారణంగానే జరుగుతున్నాయి. ఇలాంటి పరిస్థితుల్లో ఈరోజు దేశ మహిళలకు చాలా ముఖ్యమైన రోజు. గర్భాశయ క్యాన్సర్‌ను నివారించడానికి, ఇప్పుడు దేశంలోనే వ్యాక్సిన్ సిద్ధమైంది. ఈ సందర్భంగా, వ్యాక్సిన్, గర్భాశయ క్యాన్సర్‌కు సంబంధించిన ముఖ్యమైన సమాచారం మీ కోసం.
సర్వైకల్ క్యాన్సర్ అంటే..
సర్వైకల్ క్యాన్సర్ అనేది గర్భాశయ ముఖద్వారంలో మొదలయ్యే ఒక రకమైన క్యాన్సర్. స్త్రీ గర్భాశయం కింది భాగంలో గర్భాశయాన్ని, యోనిని కలిపే సిలిండర్ ఆకారంలో ఉండే దానినే గర్భాశయ ముఖద్వారాం (సర్విక్స్) అంటారు. చాలా వరకు గర్భాశయ క్యాన్సర్లు గర్భాశయం బయటి ఉపరితలంపై ఉన్న కణాల నుంచి మొదలవుతాయి. సర్వైకల్ క్యాన్సర్ సోకడానికి అతి ప్రధానమైన కారణం హ్యూమన్ పాపిలోమా వైరస్ (హెచ్‌పీవీ). ఎక్కువమంది భాగస్వాములతో లైంగిక చర్యలో పాల్గొనడం, గర్భ నిరోధక మాత్రలు ఉపయోగించడం, వంశపారం పర్యంగా.. తదితర కారణాల ద్వారా ఇది సంక్రమించే అవకాశం ఉందంటున్నారు నిపుణులు.
లక్షణాలు..
- నెలసరి సమయంలో అధికంగా రక్తస్రావం.
- మెనోపాజ్ తర్వాత, లైంగిక చర్యలో పాల్గొన్న తర్వాత.. కూడా రక్తస్రావం కావడం.
- పొత్తి కడుపులో నొప్పి రావడం, లైంగిక చర్యలో పాల్గొన్నప్పుడు-ఆ తర్వాత వెజైనా దగ్గర నొప్పి, మంట రావడం.
- దుర్వాసనతో కూడిన వెజైనల్ డిశ్చార్జి.
- పదే పదే యూరిన్‌కి వెళ్లాల్సి రావడంతో పాటు ఆ సమయంలో నొప్పిగా అనిపించడం.
- తరచూ కడుపుబ్బరం వేధిస్తున్నా, అలసట, నీరసం, విరేచనాలు.
మన దేశంలో ఎలాంటి పరిస్థితి ఉంది..
భారతదేశంలో సర్వైకల్ క్యాన్సర్ 15 నుంచి 44 సంవత్సరాల వయస్సు గల మహిళల్లో రెండవ అత్యంత సాధారణ క్యాన్సర్. ఇది 30 ఏళ్లు పైబడిన మహిళల్లో ఎక్కువగా కనిపిస్తుంది. సాధారణ రోగనిరోధక శక్తి ఉన్న మహిళల్లో గర్భాశయ క్యాన్సర్ అభివృద్ధి చెందడానికి 15 నుంచి 20 సంవత్సరాలు పడుతుంది, కానీ బలహీనమైన రోగనిరోధక శక్తి ఉన్న వ్యక్తికి 5 నుంచి 10 సంవత్సరాలు మాత్రమే పట్టవచ్చు. ప్రపంచ ఆరోగ్య సంస్థ (డబ్ల్యూహెచ్‌ఓ) గణాంకాల ప్రకారం, 2019 నుంచి భారతదేశంలో సుమారు 42 లక్షల మంది మహిళలు సర్వైకల్ క్యాన్సర్ కారణంగా మరణించారు.
రాకుండా ఎలాంటి జాగ్రత్తలు తీసుకోవాలి..
ఈ క్యాన్సర్ రాకుండా ముందుగానే తగిన జాగ్రత్తలు తీసుకోవడం మంచిది. హెచ్‌పీవీ వైరస్ సోకకుండా ముందస్తు వ్యాక్సినేషన్ కూడా ప్రస్తుతం అందుబాటులో ఉంది. దీన్ని 9 నుంచి 26 ఏళ్ల మధ్య వయసున్న అమ్మాయిలకు వేయించడం వల్ల భవిష్యత్తులో సర్వైకల్ క్యాన్సర్ బారిన పడకుండా కాపాడుకోవచ్చంటున్నారు నిపుణులు. అలాగే 21 ఏళ్లు దాటాక డాక్టర్ సలహా మేరకు నిర్ణీత వ్యవధుల్లో పాప్ స్మియర్ టెస్టు చేయించుకోవడం మంచిది.