ఈ ఆరోగ్య సమస్యలుంటే.. గ్రీన్ టీ తాగొద్దు!

గ్రీన్ టీ ఆరోగ్యానికి మంచిదే. కానీ, అందరికీ కాదని వైద్య నిపుణులు తెలుపుతున్నారు. ముఖ్యంగా వివిధ అనారోగ్య సమస్యలతో బాధపడేవారు గ్రీన్ టీకి దూరంగా ఉండటమే మేలని హెచ్చరిస్తున్నారు. ఆరోగ్యంగా ఉండేవారు కూడా గ్రీన్ టీని మోతాదు మించి తాగకూడదని తెలుపుతున్నారు. గ్రీన్ టీ శరీరంలోని కొవ్వును తగ్గించేందుకు తోడ్పడుతుందని విశ్వాసం ఉంది.

అయితే, దీన్ని రోజుకు ఒకసారి తీసుకుంటే సరిపోతుంది. అయితే, కొన్ని వాణిజ్య సంస్థలు తమ వ్యాపార అవసరాల కోసం ఎంత ఎక్కువ తీసుకుంటే అంత మంచిదనే ప్రచారం చేస్తున్నాయి. దీనివల్ల మేలు కంటే కీడే ఎక్కువ. ‘గ్రీన్ టీ’.. చైనాలో పుట్టిన హెర్బల్ టీ. సాంప్రదాయంగా తీసుకునే ఈ తేనీటి అలవాటు క్రమేనా ఆసియా అంతటా విస్తరించింది.

1. గర్బిణీలు: గర్భంతో ఉన్నవారు లేదా పిల్లల కోసం ప్లాన్ చేసుకునేవారు.. గ్రీన్ టీని అతిగా తాగరాదు. కెఫీన్ ఉద్దీపన వల్ల రక్తంలోకి చాలా సులభంగా చేరుకుంటుంది. దీనివల్ల శిశువుల్లో జీవక్రియ సమస్యలు ఏర్పడవచ్చు. కెఫిన్ ద్రవాలు, పదార్థాలను తీసుకోడానికి ముందు వైద్యులను తప్పకుండా సంప్రదించండి.

2. ఐరన్ సమస్య ఉంటే..: ఐరన్ సమస్యతో బాధపడేవారు గ్రీన్ టీకి దూరంగా ఉండటం మంచిది. హెర్బల్ టీలు.. ఆహారంలోని ఐరన్‌ను గ్రహించే శక్తిని తగ్గిస్తాయి. దీనివల్ల శరీరానికి కావల్సిన ఐరన్ అందదు.

3. ఇన్సోమ్నియా: నిద్రలేమి సమస్యతో బాధపడుతున్నవారు, ఇన్సోమ్నియాకు చికిత్స పొందుతున్నవారు గ్రీన్ టీ తాగకూడదు.

4. మధుమేహం (Diabetics): మధుమేహం ఉన్నవారు అతిగా గ్రీన్ టీ తీసుకున్నట్లయితే.. రక్తంలోని సుగర్ లెవల్స్‌పై ప్రభావం చూపే అవకాశం ఉంది. దీనివల్ల దురదులు, ఆందోళన, గుండెల్లో మంట ఏర్పడే అవకాశం ఉంది.

5. రక్తపోటు (Blood pressure): రక్తపోటుతో బాధపడుతున్న వ్యక్తులు సైతం గ్రీన్ టీకి దూరంగా ఉండాలి. గ్రీన్‌టీలో ఉండే ఉత్తేజిత లక్షణం (అడ్రినాలిన్ రష్) బీపీపై ప్రభావం చూపొచ్చు.