కార్డియోమయోపతి(Cardiomyopathy) అంటే గుండె కండరాల సమస్య. దీని కారణంగా.. శరీరంలోని భాగాలకు రక్తాన్ని పంప్‌ చేయడం గుండెకు చాలా కష్టంగా మారుతుంది. కార్డియోమయోపతిలో గుండె కండరాలు గట్టిపడతాయి, ఇది గుండె పనితీరును కష్టతరం చేస్తుందని మాయో క్లినిక్ వివరించింది. గుండె కండరాల సమస్యతో బాధపడేవారికి.. కొన్ని లక్షణాలు కనిపిస్తాయని నిపుణులు చెబుతున్నారు. వీటిని మొదటి దశలో గుర్తించి.. చికిత్స తీసుకుంటే, ప్రాణాపాయం తప్పుతుందని సూచిస్తున్నారు.
శ్వాస ఆడకపోవటం..
కార్డియోమయోపతి కారణంగా.. గుండె కండరాలు బలహీనపడతాయి, ఇతర శరీర భాగాలకు రక్తం పంప్‌ చేయడం కష్టమవుతుంది. దీని కారణంగా, శ్వాస ఆడకపోయే అవకాశం ఉంది, ఊపిరి పీల్చుకోవడంలో ఇబ్బంది ఏర్పుడుతుంది. ఇది మీరు రిలాక్స్‌గా ఉన్నప్పుడు, పనిచేస్తున్నప్పుడూ గమనించవచ్చు. ఈ లక్షణం కనిపిస్తే వెంటనే.. డాక్టర్‌ను సంప్రదించడం మేలు.
ఛాతీ వద్ద అసౌకర్యంగా ఉంటుంది..
బ్రిటన్ నేషనల్ హెల్త్ సర్వీస్ (NHS) ప్రకారం, హైపర్ట్రోఫిక్ కార్డియోమయోపతి, రిస్ట్రిక్టివ్ కార్డియోమయోపతి, బ్రోకెన్ హార్ట్ సిండ్రోమ్‌ / టకోట్సుబో కార్డియోమయోపతి ఇలా కార్డియోమయోపతిలో అనేక రకాలు ఉంటాయి. వీటన్నింటిలో గుండె కండరాలు బలహీనపడతాయి. గుండె కండరాలు బలహీనపడినప్పుడు, వ్యక్తికి ఛాతీలో కొంత అసౌకర్యంగా ఉంటుంది. ఛాతీ వద్ద నొప్పి, ఒత్తడిని కూడా అనుభవించే అవకాశం ఉంది. రక్తం పంప్‌ చేయడానికి, గుండె ఎక్కువగా కష్టపడటం వల్ల.. ఛాతీ వద్ద అసౌకర్యంగా ఉండే ఛాన్స్‌ ఉంటుంది. ఒత్తిడి కారణంగా.. శ్వాస తీసుకోవడం కష్టం అవుతుంది, ఛాతీ వద్ద నొప్పిగా ఉంటుంది.
కళ్లుతిరుగుతాయి..
కార్డియోమయోపతి కారణంగా.. తల తిరుగుతున్నట్లు ఉంటుంది. మైకం, తలనొప్పిగా అనిపించవచ్చు. కొంతమందికి కళ్లు తిరిగపడిపోతారు. మాయో క్లినిక్ ప్రకారం, కార్డియోమయోపతిలో, మైకము, తల తిరగడం, మూర్ఛపోవడం సాధారణం. గుండె లయ క్రమం తప్పడం వల్ల కూడా ఇది కావచ్చు.
గుండెనొప్పి వచ్చినప్పుడు కలిగే లక్షణాలు ఏంటంటే..
గుండె దడ..
మనం ముందుగా చెప్పుకున్నట్లుగా.. కార్డియోమయోపతి అనేది గుండె కండరాలకు సంబంధించిన సమస్య. దీని కారణంగా గుండె.. ఇతర భాగాలకు సమర్థవంతంగా రక్తాన్ని సరఫరా చేయలేదు. దీని వల్ల, అలసట, శ్వాస ఆడకపోవడం, గుండె దడ ఉంటాయి. గుండె దడ వల్ల.. హార్ట్ బీట్‌ వేగంగా ఉంటుంది. ఇది తీవ్రమైన ఒత్తిడి, వ్యాయామం సమయంలో కూడా అనుభవించవచ్చు, ఆరోగ్య పరిస్థితి వల్ల కూడా.
వీరికి ముప్పు ఎక్కువ..
అనేక కారణాల వల్ల కార్డియోమయోపతి వచ్చే ప్రమాదం ఉంది. దీర్ఘకాలిక హైపర్‌టెన్షన్‌, ఊబకాయం, విపరీతంగా ఆల్కహాల్‌ సేవించడం, డ్రగ్స్‌ వినియోగం, కీమోథెరపీ మందులు వేసుకోవడం, క్యాన్సర్‌కు రేడియేషన్‌తో చికిత్స చేయడం, కుటుంబ చరిత్ర ఉన్నా కార్డియోమయోపతి ముప్పు పెరుగుతుందని మాయో క్లినిక్ తెలిపింది. ఇంకా, మధుమేహం, థైరాయిడ్, , హిమోక్రోమాటోసిస్, కనెక్టివ్ టిష్యూ డిజార్డర్స్ వంటి అనారోగ్యాలు.. గుండె సమస్యల ముప్పు పెంచుతాయి.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.