మధుమేహం నియంత్రణకు టానిక్: స్టడీ

మధుమేహం రోగులకు శుభవార్త. రక్తంలో సుగర్ లెవెల్స్‌ను నియంత్రించేందుకు త్వరలో టానిక్ అందుబాటులోకి రానుంది. ఈ మేరకు బ్రిటీష్ కొలంబియా, ఆక్స్‌ఫర్డ్ యూనివర్శీటీల శాస్త్రవేత్తలు నిర్వహించిన పరిశోధనల్లో పలు ఆసక్తికర విషయాలు తెలిశాయి. ‘కిటోన్’ అనే ద్వికర్బన పదార్థానికి రక్తంలో చక్కెర స్థాయిలను నియంత్రించే సామర్థ్యం ఉన్నట్లు తెలుసుకున్నారు. అకస్మాత్తుగా పెరిగే సుగర్ లెవల్స్‌ను కిటోన్ అదుపులో ఉంచుతుందని పరిశోధనలో తేలింది.

ఈ సందర్భంగా పరిశోధకులు 20 మంది వ్యక్తులను దాదాపు 10 గంటలు పస్తులుంచి కీటోన్ మోనోయీస్టర్‌ను రెండు సార్లు తాగించారు. అరగంట తర్వాత వారికి 75 గ్రాముల చక్కెర ఉన్న డ్రింక్‌ను తాగించారు. ఆ తర్వాత ప్రతి 15-30 నిమిషాలకు వారి నుంచి రక్త నమూనాలు తీసుకుని పరీక్షించారు.

కిటోన్ తాగడం వల్ల వారిలో రక్తంలో చక్కెర స్థాయిలు అకస్మాత్తుగా పెరిగడం తగ్గిందని తెలుసుకున్నారు. అయితే, కిటోన్ డ్రింగ్ తాగేందుకు రుచిగా ఉండదని, దీనివల్ల మధుమేహం రోగులు వీటిని తాగడం కష్టమేనని పరిశోధకులు అభిప్రాయపడ్డారు. ఈ నేపథ్యంలో దీన్ని టానిక్ రూపంలో తీసుకోవడం ద్వారా సత్ఫలితాలు ఉంటాయా అనే విషయాన్ని పరిశీలిస్తున్నారు. ఇది విజయవంతమైతే అధిక సుగర్ లెవల్స్‌ను కంట్రోల్ చేసేందుకు ఒక మందు దొరికినట్లే.

అయితే, ఇది కేవలం అకస్మాకంగా సుగర్ పెరగకుండా మాత్రమే చూస్తుంది. శరీరానికి కావల్సిన ఇన్స్‌లిన్ ఇవ్వదు. పైగా ఈ పరిశోధనలను మధుమేహ రోగులపై కాకుండా ఆరోగ్యంగా ఉన్న వ్యక్తులపై నిర్వహించారు. ఈ నేపథ్యంలో సుగర్ లెవల్స్‌ను నియంత్రించే టానిక్ రావాలంటే ఇంకా సమయం పట్టవచ్చు.