పసుపుతో పెద్ద పేగు కేన్సర్ కు చెక్

ప్రాణాంతక సమస్యల్లో పెద్దపేగు కేన్సర్ ఒకటి. ఇటీవల ఇలాంటి కేన్సర్ కేసులు పెరగటం ఏంటో ఆందోళన కలిగిస్తోన్న అంశం. అయితే సమస్యకు గల కారణాలను అవగాహన చేసుకొని తగిన జాగ్రత్తలు తీసుకొంటే ఈ సమస్యను నివారించటం సాధ్యమే. తీసుకున్న ఆహారం పూర్తిగా జీర్ణమైన తర్వాత మిగిలిన వ్యర్ధాలు మలంగా మారతాయి. దీనిని బయటికి పంపటమే పెద్దపేగు పని. పెద్దపేగు(కొలన్)కు సోకిన కేన్సర్ ను కొలన్ కేన్సర్ అనీ, పెద్దపేగు చివరి భాగమైన పాయువు(రెక్టం) కు సోకితే రెక్టల్ కేన్సర్ అంటారు. ప్రాణాంతకమైన కేన్సర్‌ వివిధ రకాలు. అందులో పెద్ద పేగు కేన్సర్‌ ఒకటి. అయితే పెద్ద పేగు కేన్సర్‌ మూలకణంపై దాడి చేసే సమ్మేళనం ప్రతి చోట దొరుకుతుందని శాస్తవ్రేత్తలు చెబుతున్నారు. పసుపునకు పెద్ద పేగు కేన్సర్‌ను నివారించే శక్తి ఉందని సెయింట్ లూయిస్ విశ్వవిద్యాలయ శాస్త్రవేత్తల పరిశోధనలో తేలింది. పసుపు దుంపలను సిలిమారిన్ (మిల్క్ తిస్టిల్ మొక్క సీడ్స్) తో కలిపి ఉపయోగిస్తే మంచి ఫలితం ఉంటుందన్నారు. కాలేయ వ్యాధి నివారణకు సంబంధించి ఈ మిల్క్ తిస్టిల్ ఎక్కువ ఉపయోగిస్తుంటారు. అయితే ఈ పరిశోధన ఇంకా కొనసాగుతోంది. త్వరలో అన్ని విషయాలు తెలిసే అవకాశం ఉంది.
వ్యాధి లక్షణాలివి : పెద్ద పేగుకు కేన్సర్ సోకినప్పుడు పేగు బిగుసుకు పోవటం, పేగులోపల తిత్తులు(పాలిప్స్) ఏర్పడటం వంటి లక్షణాలు కనిపిస్తాయి. కొందరిలో ఈ లక్షణాలు అసలు కనిపించక పోవచ్చు. పెద్దపేగు కేన్సర్ వంశపారంపర్యంగా వస్తుందని చెప్పే ఖచ్చితమైన ఆధారాలు లేకపోయినా రాదని మాత్రం గ్యారెంటీ లేదు. అందుకే పెద్దలకు ఈ సమస్య ఉన్నప్పుడు ముందు జాగ్రత్తగా 15 ఏళ్ళు నిండిన వారి పిల్లలకు ఏడాదికి ఒకసారి ఈ పరీక్షలు చేయించటం అవసరం. అలాగే వృద్ధాప్యం, ఊబకాయం, మధుమేహం, మితిమీరిన ఫాస్ట్ ఫుడ్, మాంసాహార వినియోగం, ఆహారంలో పీచు తగినంత లేకపోవటం, ధూమపానం, మద్యపానం తదితరాలు కొలన్ కేన్సర్ సోకేందుకు ప్రధాన కారణాలు. ఈ సమస్య ఉన్నప్పుడు రోజుల తరబడి మలవిసర్జన కాకపోవటం, అయినా మలంతో బాటు రక్తం, జిగురు పడటం, మలవిసర్జన కష్టతరం కావటం, అజీర్తి లేదా విరోచనాలు, పొత్తికడుపు నొప్పి , అకారణంగా నీరసం, బరువుతగ్గడం, ఇరిటబుల్‌ బోవల్‌ సిండ్రోమ్‌(ఐబీఎస్‌) వంటి లక్షణాలు కనిపిస్తాయి. కాగా పొద్దస్తమానం కుర్చీలో కూర్చొని ఉద్యోగం చేసే వారికి పెద్ద పేగు కేన్సర్ వచ్చే అవకాశం ఉందని శాస్త్రవేత్తలు హెచ్చరిస్తున్నారు. అందువల్ల ప్రతి రోజూ ఉదయం వ్యాయామంతో పాటు.. రన్నింగ్ చేస్తుండాలని వైద్యులు సూచిస్తున్నారు.
పరీక్షలు :పెద్ద పేగు ఏ భాగానికి కేన్సర్ సోకింది? ఎంత మేర వ్యాపించింది? చుట్టుపక్క ఉన్న ఇతర అవయవాలకు కూడా సోకిందా? అనే అంశాలను బట్టి పలు పరీక్షలు చేయాల్సి ఉంటుంది. చికిత్స ఆలస్యం అయ్యేకొద్దీ కేన్సర్ పెద్ద పేగు నుంచి అక్కడి లింఫ్‌ గ్రంథులకు పాకుతుంది. అప్పుడు పరిస్థితి ప్రమాదకరంగా మారుతుంది. కొలనోస్కోపి, ఎక్స్‌రే వంటి పరీక్షల సాయంతో పెద్దపేగు కేన్సర్ బయటపడుతుంది.