పరగడుపున టమోటా జ్యూస్, స్వీట్లు తీసుకుంటే...

పరగడుపున టమోటా జ్యూస్ తాగితే మేలు కంటే కీడు జరిగే ప్రమాదం ఉందట! టమోటాల్లో ఆకలిని పెంచే గుణం ఉంది. అందుకే భోజనానికి ముందు టమోటా‌ను సూప్‌గా తీసుకుంటారు. భోజనానికి ముందు కాకుండా ఖాళీ కడుపుతో టమోటా జ్యూస్‌ తాగొద్దని ఆరోగ్య నిపుణులు హెచ్చరిస్తున్నారు. టమోటాల్లోని టానిక్‌ యాసిడ్‌లు ఎసిడిటీని పెంచి పేగుల ఆరోగ్యాన్ని దెబ్బతీస్తాయని పేర్కొన్నారు.

శరీరంలో మెగ్నీషియం మూలకం ఎక్కువైతే గుండె సంబంధిత వ్యాధులు ముప్పు వాటిల్లే ప్రమాదం ఉందట. అరటిలో మెగ్నీషియం పుష్కలంగా ఉంటుంది. కాబట్టి పరగడుపున దీన్ని తీసుకుంటే శరీరంలో మెగ్నీషియం స్థాయి ఒక్కసారిగా పెరిగే ప్రమాదం ఉందట. దీని వల్ల గుండెనొప్పి, గుండె సంబంధ సమస్యలు తలెత్తే అవకాశం ఉందని నిపుణులు అంటున్నారు.

భోజనానికి ముందుగానీ, ఆ తర్వాతగానీ అరటి పండు తింటే ఫలితం ఉంటుందట. కొందరికి ఉదయాన్నే స్వీట్లు తినే అలవాటు ఉంటుంది. ఇలా చేయడం వల్ల డయాబెటిస్‌ ప్రమాదం పొంచి ఉంటుందని చెబుతున్నారు. పరగడుపున తీపి పదార్థాలు తినడం వల్ల శరీరంలో చక్కెరస్థాయి పెరిగడంతో క్లోమగ్రంథి మీద అదనపు భారం పడుతుంది. దీంతో డయాబెటిస్‌కి దారితీసే అవకాశం కూడా ఉందని అంటున్నారు.