5:2 డైట్‌..
దీన్నే ఫాస్ట్‌ డైట్‌ అని అంటారు. ఈ రకం ఉపవాసంలో.. వారానికి ఐదురోజులు సాధారణంగానే ఆహారం తీసుకుంటారు. రెండు రోజులు మాత్రం ఉపవాసం ఉండాలి. ఈ రెండు రోజుల్లో మహిళలు 250 కేలరీల చొప్పున, పురుషులు 300 కేలరీల చొప్పున రెండు సార్లు ఆహారం తీసుకోవాలి. అంటే మహిళలు 500 కేలరీలు, పురుషులు 600 కేలరీలకు మించకుండా ఆహారం తీసుకోవాలనమాట.
ఈట్‌ స్టాప్‌ ఈట్‌..
కొన్నేళ్లపాటు ఈ ఫాస్టింగ్‌ బాగా ప్రాచుర్యంలో ఉంది. దీన్ని ఫిట్‌నెస్‌ నిపుణుడు బ్రాడ్‌ పిలాన్‌ ప్రవేశపెట్టారు. ఇందులో వారంలో 48గంటల పాటు ఉపవాసం ఉండాలి. అంటే ఓ రోజు రాత్రి డిన్నర్‌ చేశాక మరుసటి రోజు రాత్రి డిన్నర్‌ చేసేంతవరకు ఉపవాసం ఉండాలి. దీన్ని బ్రేక్‌ఫాస్ట్‌ నుంచి బ్రేక్‌ఫాస్ట్‌ మధ్య ఉపవాసంగానూ చేసుకోవచ్చు. ఉపవాసం సమయంలో నీళ్లు, కాఫీ, జీరో కేలరీలు ఉండే ఇతర పానీయాలు తీసుకోవచ్చు.
స్పాంటేనియస్‌ మీల్‌ స్కిప్పింగ్‌
ఇందులో వారంలో రెండు రోజులు బ్రేక్‌ఫాస్ట్‌ లేదా డిన్నర్‌ తీసుకోకూడదు. ఉదాహరణకు ఏదైనా రోజు ఆకలి లేనప్పుడు ఉదయం బ్రేక్‌ఫాస్ట్‌ మానేసి, మధ్యాహ్నం లంచ్, రాత్రి డిన్నర్‌ మీకు ఇష్టమైనవి తినొచ్చు. ఎప్పుడైనా ప్రయాణాలు చేస్తున్నప్పుడు ఒక్కోసారి తినడానికి ఏమీ దొరకవు. అలాంటప్పుడు ఈ పద్ధతి ఫాలో అవ్వొచ్చు.
ది వారియర్‌ డైట్‌
ఇందులో రోజూ తెల్లవారుజామున 4గంటల నుంచి మధ్యాహ్నం 12లోపు తక్కువ మొత్తంలో పండ్లు, కూరగాయలు తీసుకోవాలి. తర్వాత సాయంత్రం 4నుంచి 8గంటల లోపు ఎక్కువ మొత్తంలో ఆహారం తీసుకోవాలి.
ఆల్టర్నేటివ్‌ డే
ఇందులో వారంలో మూడు రోజులు రోజు మార్చి రోజు ఉపవాసం ఉండాలి. లేదా 500 కేలరీల ఆహారం తీసుకోవాలి. దీనివల్ల ఎక్కువ ఆరోగ్య ప్రయోజనాలు ఉన్నాయని పరిశోధనలు చెబుతున్నారు. ఉపవాసం రోజు రాత్రి ఖాళీ కడుపుతో నిద్రపోవడం అంత సులభం కాదు.
16/8 మెథడ్‌..
దీన్నే లీన్‌గెయిన్స్‌ ప్రొటోకాల్‌ పద్ధతి అని కూడా అంటారు. ఇందులో ఉదయం టిఫిన్‌ తీసుకోకూడదు. మధ్యాహ్నం 12గంటల నుంచి రాత్రి 8గంటల లోపల రెండు, లేదా మూడు అంతకంటే ఎక్కువ సార్లు ఆహారం తీసుకోవచ్చు. అంటే రాత్రి ఎనిమిది నుంచి మరుసటి రోజు మధ్యాహ్నం వరకు అంటే సుమారు 16గంటల పాటు ఉపవాసం ఉండాలి. మహిళలైతే 15గంటలు ఉంటే చాలు. అయితే, ఫాస్టింగ్‌ సమయంలో నీళ్లు, కాఫీ, ఇతర జీరో కేలరీల పానీయాలు తీసుకోవచ్చు. దీనివల్ల భోజనంపై ధ్యాస కూడా తగ్గుతుంది. ఉపవాసం ముగిశాక తీసుకునే ఆహారం మాత్రం ఎనర్జిటిక్‌గా ఉండాలి. ఈ సమయంలో జంక్‌ ఫుడ్‌కు దూరంగా ఉండండి.
జంక్‌ వద్దు..
ఫాస్టింగ్‌ చేస్తున్నాం కదా అనుకుంటూ నూనె వస్తువులు, ఎక్కువ ఫ్యాట్‌ ఉన్న ఆహారం, క్యాలరీలు ఉండే జంక్‌ ఫుడ్‌ తింటే మీకు మంచి రిజల్ట్‌ రాదు. పాలిష్‌ చేయని ధాన్యాలు, ఆకు కూరలు, ప్రొటీన్లు, ఫైబర్‌ ఎక్కువగా ఉండేకూరగాయలు, పండ్లు వంటివి ఆహారంలో ఉండేలా జాగ్రత్తపడాలి. దీంతోపాటు వర్కవుట్‌ చేస్తే మంచిది..
వీళ్లు చేయకూడదు..
ఉపవాసం ఆరోగ్యంగా ఉన్నవారు చేయవచ్చు. కానీ క్యాన్సర్‌, మధుమేహం, టీబీ బాధితులు వైద్యులను అడిగి చేయడం మంచిది. పైగా అందరికీ ఒకే రకమైన ఉపవాసం పనికిరాదు. శరీరతత్త్వాన్ని బట్టి ఎవరికి ఏది సూట్‌ అవుతుందో.. అది ఫైలో అయితే మంచిది.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.