అరటి తొక్కతో అద్భుత ప్రయోజనాలు!

మనలో చాలా మందికి అరటి పండు తినడం ఎంత అలవాటో.. దాని తొక్కను కూడా చెత్త బుట్టలో వేయడం అంతే అలవాటు. కానీ అరటి తొక్కతో చాలా ప్రయోజనాలున్నాయి. అవేంటో చదివితే తొక్కే కదా అని విసిరేయడం మానేస్తారు.
- దోమలు లేదా ఏదైనా ఇతర కీటకాలు కుట్టినప్పుడు చాలా మంటగా ఉంటుంది. అవి కుట్టిన చోట అరటి తొక్కతో రుద్దడం వల్ల దురద తగ్గుతుంది.
- అరటి పండు తొక్కలో పీచు పదార్థాలు ఎక్కువగా ఉంటాయి. కాబట్టి దీన్ని తినడం వల్ల సాఫీగా మలవిసర్జన అవుతుంది. అరటి పండు తొక్కను పూర్తిగా తినలేకపోయినా.. దాని లోపలి భాగంలో ఉండే తెల్లని పదార్థాన్ని స్పూన్‌తో తీసుకోని తినడం వల్ల కూడా ఫలితం ఉంటుంది.
- దంతాలు తెల్లగా లేవని బాధపడుతున్నారా? ఇక బాధపడటం మానేసి అరటి పండు తొక్క లోపలి భాగాన్ని దంతాలపై రుద్దండి. రెండు వారాల పాటు ఇలా చేయడం వల్ల మీ దంతాలు తెల్లగా మెరుస్తాయి.
- అరటి పండు, తొక్కలోని యాంటీ ఆక్సిడెంట్లు చర్మానికి ఎంతగానో ఉపయోగపడతాయి. అరటి తొక్కను ముఖంపై రుద్ది.. అర గంటయ్యాక కడిగేసుకోండి. ఇలా చేయడం వల్ల ముఖంపై ముడతలు తగ్గుతాయి.

- అరటి పండు తొక్క లోపలి భాగాన్ని తినడం వల్ల రాత్రిళ్లు మంచి నిద్ర పడుతుంది.
- వయసు పెరిగే కొద్దీ కంటి చూపు మందగిస్తుంది. అరటి పండు తొక్క లోపలి భాగాన్ని తినడం వల్ల దృష్టి సంబంధ సమస్యలు తగ్గుతాయి. అరటి తొక్కలో ల్యూటిన్ అనే శక్తివంతమైన యాంటీ ఆక్సిడెంట్ ఉంటుంది. ఇది అతినీలలోహిత కిరణాల ప్రభావం నుంచి కంటిని కాపాడుతుంది.
- అరటి తొక్కలోని పీచు పదార్థాలు గుండె జబ్బులు రాకుండా కాపాడుతాయి. ఇవి కొలెస్ట్రాల్‌ను కరిగిస్తాయి. ఫలితంగా మీ గుండె ఆరోగ్యంగా ఉంటుంది.
- పులిపిర్లు మిమ్మల్ని వేధిస్తున్నాయా? అయితే వాటిపై అరటి తొక్కను ఉంచి దానిపై బ్యాండ్ ఎయిడ్‌తో పట్టీలా వేయండి. ఇలా కొద్ది రోజులు చేయడం వల్ల పులిపిర్లు రాలిపోతాయట.
- అరటి పండు తొక్కలో ఉండే అమైనో ఆమ్లాలు మంచి మూడ్ కలిగించే హార్మోన్లను విడుదల చేయడంలో తోడ్పడతాయట.
ఇదంతా చదివాక అరటి పండు తొక్క తినేయాలని డిసైడ్ అయ్యారా? మంచిదే కాకపోతే.. ఈ మధ్య రసాయనాలతో అరటి పళ్లను మగ్గబెడుతున్నారు. కాబట్టి కాస్త జాగ్రత్త వహించండి.