పీడ కలలు దేనికి సంకేతాలు? వీటివల్ల కలిగే సమస్యలేమిటీ?

మిమ్మల్ని నిత్యం పీడకలు వెంటాడుతున్నాయా? వాటి వల్ల సరిగా నిద్ర పట్టడం లేదా? అయితే.. మీకు భవిష్యత్తులో అనారోగ్య సమస్యలు తలెత్తే అవకాశాలు ఉన్నాయి. పీడ కలలతో బాధపడే వ్యక్తులు ఆందోళన, తీవ్ర ఒత్తిడి, కుంగుబాటుకు గురికావచ్చని పరిశోధకులు తెలుపుతున్నారు.

నిద్రలో వచ్చే పీడ కలలు వాస్తవానికి దగ్గరగా ఉంటాయి. వీటి వల్ల కళ్లు మూసి నిద్రపోవాలంటేనే భయపడే పరిస్థితి ఉంటుంది. ఇది క్రమేనా నిద్రలేమికి దారితీస్తుంది. తాజా అధ్యయనాల ప్రకారం.. పీడ కలలు లేదా చెడు కలలు వల్ల బాధ, కోపం, గందరగోళం, నిరాశ, అపరాధ భావన, అసహ్యం వంటివి ఏర్పడతాయి.

ఇటీవల ఓ సంస్థ 351 మంది పెద్దలపై నిర్వహించిన పరిశోధనలో చాలామంది పీడ కలలతో బాధపడుతున్నారని, వారిని ఏదో చెడు శక్తి తరుముతున్న భావానికి గురవ్వుతున్నారని తేలింది. ఈ పీడకలలు నిత్యం వెంటాడుతుంటే అవి అనారోగ్యానికి సంకేతాలని భావించాలని పరిశోధకులు తెలుపుతున్నారు. పెద్దల్లో సుమారు 2 నుంచి 8 శాతం మంది ఈ సమస్య వల్ల నిద్రలేని రాత్రులు గడుపుతున్నారని పేర్కొన్నారు.

ఈ పరిస్థితిని ఆర్‌ఈఎం స్లీప్ బిహేవియర్ డిజార్డర్ అంటారని తెలిపారు. ఈ సమస్య ఉన్నవారికి ఎక్కువగా పీడ కలలు వస్తాయని, తమ చుట్టూ ఏవో తిరుగుతున్నట్లు, భయపెడుతున్నట్లు భావిస్తారని, కొందరు మంచంపై నుంచి ఎగిరి దూకుతారని వివరించారు. జాసన్ ఎల్లీస్ అనే పరిశోధకుడు ‘సీఎన్ఎన్’తో మాట్లాడుతూ.. ‘‘రాత్రి వేళల్లో ఏర్పడే చెడు కలలు రావడానికి కారణాలైతే తెలియరాలేదు. అయితే, వాటి వల్ల కలిగే నిద్రలేమి వల్ల ఎన్నో అనారోగ్య సమస్యలు ఏర్పడతాయి. ఇది క్రమేనా ఒత్తిడికి దారితీసి మనిషిని కుంగదీస్తాయి’’ అని తెలిపారు. మీకూ పీడకలలు వస్తున్నట్లయితే తప్పకుండా జాగ్రత్తగా ఉండండి. వీలైతే మానసిక నిపుణులను సంప్రదించండి.