ఆ వేళలో అంగస్తంభనలు కలగట్లేదా.. జాగ్రత్త!

చాలా మంది తమ శృంగార సామర్థ్యాన్ని పెంచుకోవాలని భావిస్తుంటారు. సెక్స్‌లో యాక్టివ్‌గా ఉండాలని, తమ పార్టనర్‌తో చాలా సేపు ఎంజాయ్ చేయాలని భావిస్తుంటారు. శృంగార వాంఛలు అధికంగా ఉండటమనేది భాగస్వామితో మీరు గడిపే విధానంపైనే కాకుండా ఓవరాల్‌గా ఆరోగ్యంపై కూడా ప్రభావం చూపుతుందట. ఉదయం వేళలో అంగస్తంభనలు రావడం మంచిదేనని, చక్కటి లైంగిక ఆరోగ్యాన్ని కలిగి ఉన్నారనేందుకు ఇది సూచిక అని తెలిసిందే. కానీ ఇది మీ గుండె పనితీరుతో కూడా సంబంధాన్ని కలిగి ఉంటుందని తాజాగా ఓ అధ్యయనం వెల్లడించింది.

పురుషుల్లో రాత్రివేళ కంటే తెల్లవారుజామున అంగస్తంభనలు ఎక్కువగా ఉంటాయి. శరీరానికి తగిన విశ్రాంతి దొరకడం, ఎలాంటి ఒత్తిడి లేకపోవడమే దీనికి కారణం. కానీ ఆ సమయంలో అంగస్తంభనలు లేకపోవడం అనేది గుండె సంబంధ జబ్బులకు ముందస్తు హెచ్చరిక లాంటిదని పరిశోధకులు చెబుతున్నారు. ఎందుకంటే.. పురుషాంగంలో ఉండే ధమనులు మిగతా శరీర భాగాల్లోని ధమనుల కంటే చిన్నవిగా ఉంటాయి. కాబట్టి గుండె పనితీరు ఏ మాత్రం మందగించినా, ధమనుల్లో లోపం తలెత్తినా.. దాని ప్రభావం అంగస్తంభనలపై ఉంటుంది.

అంగస్తంభనలకు గుండె ఆరోగ్యంతో సంబంధం ఉంది. కాబట్టి అంగస్తంభన సమస్యలతో ఇబ్బందులు పడేవారు వయాగ్రా లాంటి మాత్రలు వాడే బదులు సమస్యను పరిష్కరించుకోవడం కోసం నిపుణులను కలవాలని సూచిస్తున్నారు. ఈ విషయంలో మీకు ఏమాత్రం సందేహం కలిగినా.. ఉదయం వేళ అంగస్తంభనలు కలగడం లేదనే అనుమానం వచ్చినా.. వెంటనే ఎక్సర్‌సైజ్ చేయడంపై దృష్టి పెట్టండి. చక్కటి డైట్ ఫాలో అవుతూ.. ఒంట్లో కొవ్వును తగ్గించుకోండి. లేదంటే.. మీ గుండె ఆరోగ్యం దెబ్బతింటుంది జాగ్రత్త.