రాత్రి త్వరగా చేయాల్సిన పని అదే

రోజంతా ఆఫీసులో బిజీబిజీగా గడిపిన వారు రాత్రి ఇంటికి వచ్చిన చేయాల్సిన మొదటి పని ఒకటుంది. రుచికరమైన, ఆరోగ్యకరమైన భోజనం తినాలి. ఫోన్లో మాట్లాడుతూ ఉండడమో లేదా టీవీ చూస్తూ ఉండడమో లేదా చాటింగ్ చేయడమో ఇలా కొన్ని కారణాల వల్ల రాత్రి భోజనం ఆలస్యంగా చేస్తుంటాము. కానీ నైట్ త్వరగా భోజనాన్ని తినటం వలన కలిగే ఆరోగ్య ప్రయోజనాల గురించి మనలో చాలా మందికి తెలియదు. ఆలస్యంగా తింటే జీర్ణాశయంపై ఒత్తిడి ఏర్పడటం వలన గుండెమంట, గ్యాస్ సమస్యలు, జీర్ణాశయ సంబంధిత సమస్యలు వస్తాయి. లేట్‌గా తినటం వలన ఆకలి ఎక్కువ అనిపించి అధికంగా ఆహారాన్ని తీసుకుంటారు. దీని వలన ఉదయాన అల్పాహారం తినాలనిపించదు. ఫలితంగా, ఇన్సులిన్ నిల్వ పెరిగి శరీరంలో కొవ్వు పదార్థాల నిల్వ అధికమై శరీర బరువు పెరుగుతుంది. రాత్రి భోజనం ఆలస్యంగా చేయటం వలన గురకలు పెట్టే అవకాశం ఉంది. అలాగే గుండెపోటు లేదా గుండె సంబంధిత వ్యాధులకు గురయ్యే అవకాశాలున్నాయి.

రాత్రి పది తర్వాత అన్నం తీసుకుంటే నిద్రలేమి సమస్య తప్పదు. లేటుగా తింటే కడుపులో ఆమ్లాల ఉత్పత్తి పెరిగి, నిద్ర కష్టమవుతుంది. నిద్ర పోవటానికి 2-3 గంటల ముందే భోజనం చేసెయ్యాలి. ఆకలి అనిపిస్తే పడుకోబోయే ముందు ఏదైనా తేలికపాటి చిరుతిండి తినొచ్చు. అందువల్ల లేటుగా తిండి తినడం వెంటనే మానేయండి.