కాటన్ బడ్స్‌తో గుబిలి తీస్తున్నారా? ఇది చదవండి

కొందరు వ్యక్తిగత పరిశుభ్రతపై చాలా శ్రద్ధ వహిస్తారు. అందులో భాగంగా రెగ్యులర్‌గా ఇయర్ బడ్స్‌తో చెవిలో గుబిలి తీసుకుంటుంటారు. కానీ చెవిలో గుబిలిని ప్రత్యేకంగా ఇయర్ బడ్స్ తీసుకోవాల్సిన అవసరం లేదు. ఈ విషయం మేం చెబుతున్నదే కాదు.. ఏ డాక్టరైనా, ఈఎన్‌టీ నిపుణులైనా ఇదే చెప్తారు. ఎందుకో తెలుసా ఇయర్ బడ్స్ వాడటం వల్ల చెవి లోపలి భాగంలో గాయాలయ్యే ప్రమాదం ఉంది. వినడానికి కాస్త ఫన్నీగా ఉన్నా.. ఉత్పత్తిదారులు కూడా ఇయర్ బడ్స్‌పై అదే గమనిక రాస్తారు.

వాస్తవానికి చెవిలో గుబిలి ఉండటం మంచిదే. ఇందులో ఉండే యాంటీ బ్యాక్టీరియల్ గుణాలు.. ఇన్ఫెక్షన్లు రాకుండా అడ్డుకుంటాయి. అంతే కాకుండా చీమలు, పురుగులు లాంటి కీటకాలు చెవిలో దూరకుండా అడ్డకుంటుంది. గుబిలి లుబ్రికెంట్‌గా పని చేసి చెవి పొడిగా మారి దురద పెట్టకుండా చూస్తుంది.

కాటన్ ఇయర్ బడ్స్‌తో చెవిని శుభ్రం చేయడం వల్ల కర్ణభేరికి ప్రమాదం వాటిల్లుతుంది. ఫలితంగా చెవుడు వచ్చే అవకాశాలు ఉన్నాయి. చెవిలోకి ఏదైనా వస్తువును దూర్చి గుబలి తీసుకునే క్రమంలో అది కర్ణభేరిని గాయపర్చే అవకాశం ఉంది. మరి గుబిలి తీసుకోకుండా.. చెవిలోనే ఉంచుకుంటే ఎలా అంటారా? గుబిలి దానతంట అదే బయటకు వెళ్లేలా చెవి నిర్మాణం ఉంటుంది. మాట్లాడేటప్పుడు, తినేటప్పుడు, ఏదైనా నమిలేటప్పుడు దవడను కదిలిస్తా కదా.. ఆ కదలికల వల్ల చెవిలోని గుబిలి బాహ్య చెవిలోకి వస్తుంది.

మనం చేయాల్సిందల్లా స్నానం చేశాక టవల్‌ను మరీ చెవిలోకి దూర్చకుండా శుభ్రం చేయడమే. రెగ్యులర్‌గా గుబిలిని తీయడం వల్ల చెవి క్లీన్‌గా ఉందని మనం ఫీలవుతామేమో కానీ.. చెవి పొడిగా మారి దురదపెట్టే అవకాశం ఉంది. అంతే కాకుండా ఇన్ఫెక్షన్ల బారిన పడే ప్రమాదం కూడా ఉంది. కాబట్టి చెవిలో గుబిలి ఉన్నా ఫర్వాలేదు. ఇయర్ బడ్స్‌తో దాన్నే శుభ్రం చేయాల్సిన పని లేదు.