Silk saree care: ఈ టిప్స్‌ ఫాలో అయితే.. మీ పట్టు చీరలు ఎప్పుడూ కొత్తగా ఉంటాయ్..

వేసవి కాలం అంటేనే పెళ్ళిళ్ల సీజన్. పెళ్ళిళ్లంటేనే.. పట్టు చీరలు, నగలు. పెళ్లికి తళతళలాడే పట్టు చీర కంపల్సరీ.. వేలు, లక్షలు పోసి కొనుక్కునే చీరలను సరిగా కాపాడుకోకపోతే వాటి అందం చెడిపోయి వెలవెలపోతాయి. ఖరీదైన చీరల్ని సరిగా భద్రపరచకపోతే కొన్నాళ్లకే అవి పాతవిగా మారిపోతాయి. పట్టు చీరలను చాలా జాగ్రత్తగా కాపాడుకోవాలి. కాస్త జాగ్రత్త తీసుకుంటే ఇలాంటి చీరలను ఏళ్ల తరబడి కొత్త వాటిలాగా కనిపించేట్లు కాపాడుకోవచ్చు. ఆ టిప్స్‌ ఏంటో చూసేయండి మరి..

• పట్టు చీరల్ని కట్టుకున్న ప్రతిసారీ ఉతకడం వల్ల వాటి మెరుపు కోల్పోతాయి. ఓసారి వాడిన చీరని గాలి ఎక్కువగా వచ్చే ప్రదేశంలో ఆరేయాలి. తర్వాత కాటన్‌ లేదా మస్లిన్‌ వస్త్రంలో చుట్టి మీ బట్టల అలమరాలో పెట్టండి.
• పట్టు చీరల్ని ఎక్కువ రోజులు బయటకు తీయకపోతే మడతల్లోనే చిరుగులు వచ్చేస్తాయి. అందుకే మడతలను ప్రతి మూడు నెలలకు ఒకసారైనా మార్చాలి. ఇలా చేస్తే ఫంగస్‌, దుర్వాసన వంటివాటిని నియంత్రించవచ్చు.
• పట్టు చీరలకి ప్రత్యేకించి డ్రై క్లీన్ చేయడం వల్ల మెరుపు పోకుండా ఉంటుంది. మీరు హాండ్ వాష్ చేయదల్చుకున్నా మొదటి సారి మాత్రం డ్రై క్లీన్ చేయించండి. తరువాత బేబీ షాంపూ తో వాష్ చేయవచ్చు.
• చీరలపై మరకలు పడినప్పుడు చల్లటి నీళ్లతో వెంటనే శుభ్రం చేయండి. వేడినీళ్లను ఎట్టి పరిస్థితిలోనూ వాడొద్దు. లేదంటే మరకపడిన వెంటనే కాస్త గ్లిజరిన్‌ లేదా టాల్కమ్‌ పౌడర్‌ చల్లి తర్వాత ఉతకండి.
• పట్టుచీరలను ఉతికేప్పుడు సాఫ్ట్‌ వాటర్‌తో ఉతకండి. హార్డ్‌ వాటర్‌ను సాఫ్ట్‌గా చేయడానికిచిటికెడు బోరాక్స్ లేదా అమోనియం దానిలో వేయాలి. లైట్‌ డిటర్జెంట్లను వినియోగించాలి. సబ్బు, బేబీ షాంపూను వీలైనంత తక్కువగా వాడాలి. పట్టు వస్త్రాలను వేడి నీటిలో రెండు మూడు సార్లు జాడించాలి. చివరగా చల్లని నీటితో జాడించేటప్పుడు కొన్ని చుక్కల సిట్రిక్ యాసిడ్ లేదా ఎసిటిక్ యాసిడ్‌ వేయాలి.
• రంగు చీరలు అయితే అంచును నీళ్లలో తడిపి, చేతితో రుద్ది రంగు పోతుందో లేదో పరిశీలించాలి. 10 చుక్కల నిమ్మకాయ రసం వేసి, దానిలో చీరను ఉంచి వెంటనే ఉతకాలి.
• పట్టు వస్త్రాలు ఎక్కువగా నీటిని పీల్చుకొని, వదిలే గుణాలను కలిగి ఉంటాయి. వీటిని ఎక్కువ సమయం నీటిలో ఉంచితే రంగు పోతుంది.
• పట్టు వస్త్రాలను శుభ్రత తర్వాత గట్టిగా పిండకుండా, మలవకుండా నీడలో ఆరేయాలి.
• తేమగా ఉన్నప్పుడు ఇస్త్రీ చేస్తే వేడి ప్రభావం దుస్తులపై పడదు.
• శుభ్రతకు గోరు వెచ్చని మంచినీరు మాత్రమే వినియోగించాలి.
• బీరువాలో భద్రపరిచే సమయంలో కలరా గోళీలు కాకుండా గంధపు చెక్క ముక్కలు గుడ్డలో చుట్టి ఉంచాలి. మిరియాలను ఒక వస్త్రంలో చుట్టి చీరల మధ్యలో ఉంచినా మంచిదే. దీనివల్ల తేమ చెరకుండా ఉంటుంది.