Infertility: పిల్లలు పుట్టకపోవడానికి.. ప్రధాన కారణాలు ఇవే..!

పురుషులు, స్త్రీల పునరుత్పత్తి వ్యవస్థలో హార్మోన్లు కీలక పాత్ర పోషిస్తాయి. మహిళల్లో హార్మోన్‌ అసమతుల్యత కారణంగా.. ఒవ్యూలేషన్‌ సమస్యలు, నెలసరి క్రమం తప్పడం, సంతానోత్పత్తిలో సమస్యలకు దారి తీస్తుంది. పురుషులలో హార్మోన్ల అసమతుల్యత ఉంటే.. స్పెర్మ్ కౌంట్ తక్కువగా ఉండటం, అంగస్తంభన లోపం, సెక్స్ డ్రైవ్ తగ్గడం వంటి సమస్యలు ఎదుర్కొంటారు.

మహిళల వయస్సు పెరిగే కొద్దీ.. వారి పునరుత్పత్తి సామర్థ్యం క్షీణిస్తూ వస్తుంది, వారు గర్భం దాల్చడం కష్టమవుతుంది. మహిళలు పుట్టేప్పుడే.. పరిమిత సంఖ్యలోనే ఎగ్స్‌ ఉంటాయి. ఇవి నెలా వచ్చే పీరియడ్స్‌లో కొన్ని గుడ్లను కోల్పోతూ ఉంటారు. 35 సంవత్సరాలు దాటిన తర్వాత... ఎగ్స్‌ సంఖ్య వేగంగా తగ్గడం ప్రారంభమవుతుంది. దీంతో సంతానోత్పత్తి సామర్థ్యం తగ్గుతూ వస్తుంది. పురుషులలోనూ వయస్సు పెరిగే కొద్దీ.. స్పెర్మ్‌ కౌంట్‌, నాణ్యతలో తగ్గుదల కనిపిస్తుంది. దీని కారణంగా మగవారిలో ఇన్ఫెర్టిలిటీ పెరుగుతుంది.

పాలిసిస్టిక్ ఓవరీ సిండ్రోమ్ (PCOS) మహిళల్లో సాధారణ వ్యాధిగా మారుతోంది. పీసీఓఎస్‌ ఉన్న మహిళల్లో అసాధారణ స్థాయిలో ఆండ్రోజన్స్ (పురుష హార్మోన్లు) ఉత్పత్తవుతుంటాయి. ఇవి అండాశయాలపై చిన్న చిన్న సిస్టుల్లాగా కనిపిస్తుంటాయి. దీంతో హార్మోన్ల స్థాయుల్లో హెచ్చుతగ్గులు ఉంటాయి. పీసీఓఎస్‌ కారణంగా ఎగ్‌ సరిగ్గా విడుదల కాదు. పీసీఓఎస్‌ ఇన్‌ఫెర్టిలిటీకి దారితీస్తుంది.

Also Read: ఇలా చేస్తే.. పీసీఓఎస్‌ ఉన్నా ఈజీగా ప్రెగ్నెన్సీ వస్తుంది..!​

సాధారణంగా ఎండోమెట్రియం గర్భాశయం లోపలే ఉంటుంది. కానీ కొందరిలో దీని కణజాలం గర్భసంచి బయటా ఉండొచ్చు. పొత్తి కడుపులో, పొట్ట గోడకు ఆనుకునే పెరిటోనియంలో, అండాశయాల మీద, అండనాళాల మీద, గర్భాశయం.. మలద్వారం మధ్యలో ఎక్కడైనా ఉండొచ్చు. దీన్నే ఎండోమెట్రియోసిస్‌ అంటారు. వీరిలో అండనాళాలు బాగున్నప్పటికీ ఎగ్‌ క్వాలిటీ తగ్గుతుంది. గర్భాశయంలో తిత్తులను తీసేసినప్పుడు అండాలూ తగ్గిపోతాయి. మరోవైపు సంభోగంలో పాల్గొనటానికీ ఇబ్బంది పడుతుంటారు. ఇవన్నీ ఇన్‌ఫెర్టిలిటీకి దారితీస్తాయి.

వేరికోసెల్, పురుషులు ఎదుర్కొనే సమస్య. దీనిలో పురుషల వృషణాల సిరలలో వాపు ఉంటుంది, ఇది వృషణాల ఉష్ణోగ్రతను పెంచుతుంది. వరికోసెల్‌ స్పెర్మ్‌ ఉత్పత్తిని ప్రభావితం చేస్తుంది. దీని కారణంగా స్పెర్మ్‌ కౌంట్‌, స్మెర్మ్ క్వాలిటీ తగ్గుతుంది. దీంతో పురుషులలో ఇన్ఫెర్టిలిటీకి దారి తీస్తుంది.

ధూమపానం, మద్యపానం, మాదకద్రవ్యాల వాడకం, ఊబకాయం వంటి అనారోగ్యకరమైన జీవనశైలి కారకాలు సంతానలేమికి దారితీస్తాయి. ఈ కారకాలు పునరుత్పత్తి అవయవాలను దెబ్బతీస్తాయి, హార్మోన్ల అసమతుల్యతకు దారితీస్తాయి, స్మెర్మ్‌, ఎగ్‌ క్వాలిటీ తగ్గుతుంది. దీనివల్ల పిల్లలు పుట్టడం కష్టమవుతుంది.

శస్త్రచికిత్సలు, ఇన్ఫెక్షన్లు, గాయాల కారణంగా పునరుత్పత్తి అవయవాలకు నష్టం జరిగితే.. ఇన్‌ఫెర్టిలిటీకి దారితీస్తుంది. ఎగ్‌ ఫెర్టిలైజేషన్‌, ఇంప్లాంటేషన్‌ సమస్యలు ఎదురవుతాయి. పురుషులలో.. వృషణాలు, ప్రోస్టేట్ గ్రంధి దెబ్బతినడం వలన తక్కువ స్పెర్మ్ కౌంట్, పేలవమైన స్పెర్మ్ నాణ్యత సంతాన లేమికి దారితీస్తుంది.

Also Read: గర్భిణులు వేసవిలో ఈ ఆహారం తింటే.. తల్లీ, బిడ్డ ఆరోగ్యంగా ఉంటారు..!​

గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.