త్రికోణాసనం..
త్రికోనాసనం హామ్ స్ట్రింగ్స్‌ను బలోపేతం చేస్తుంది. ఈ ఆసనాన్ని త్రిభుజ భంగిమ అని కూడా పిలుస్తారు. ఈ ఆసనం క్రమం తప్పకుండా సాధన చేస్తే.. ఎన్నో ప్రయోజనాలు ఉంటాయి. వెన్ను సమస్యలు లేదా హెర్నియా ఉన్న తల్లులు ఈ ఆసనం వేయకూడదు.
ఎలా చేయాలి..?
రెండు కాళ్ల మధ్య 3 అడుగుల దూరం ఉండాలి. రెండు చేతులను సమాంతరంగా లేపాలి. కుడి చేతిని కుడి పాదంపై ఉంచి, ఎడమచేతిని గాల్లో పైకి లేపాలి. తలను గాల్లో ఎడమ చేతి వైపునకు తిప్పాలి. అలా 10-30 సెకన్ల పాటు ఉండాలి. తర్వాత సాధారణ స్థితికి వచ్చి, ఇదే తీరుగా ఎడమవైపునకు కూడా చేయాలి.
ఉపయోగాలు..
- చీలమండలు, మోకాలు, వెన్నెముక, భుజాలు, స్నాయువులను స్ట్రెచ్‌ చేస్తుంది.
- జీర్ణశక్తిని మెరుగుపరుస్తుంది, వెన్నునొప్పిని నయం చేస్తుంది.
- శరీర సమతుల్యత కోల్పోవడం, ఆస్టియోపోరోసిస్‌ సమస్యను దూరం చేస్తుంది.
Cobra Pose (Bhujangasana)
భుజంగాసనం బ్యాక్-బెండింగ్ ఆసనం. ఇది సూర్య సమస్కారాల్లో ఒక భాగం. ఈ భంగిమ మీ వెన్నుపూసను విస్తరిస్తుంది. కొత్త తల్లులు ఈ ఆసనం ప్రాక్టిస్ చేస్తే.. నిరాశ, ఒత్తిడి తగ్గుతుంది. ప్రశాంతంగా ఉంటారు.
ఎలా చేయాలి..
బోర్లా పడుకొని శరీరం మొత్తాన్ని పూర్తిగా సాగదీయాలి. రెండు పాదాల వేళ్లు, మడమలు తాకేలా చూసుకోవాలి. అరచేతులను ఛాతీ పక్కలకు తీసుకొచ్చి, నేలకు ఆనించాలి. శ్వాసను తీసుకుంటూ నెమ్మదిగా తల, ఛాతీని పైకి లేపాలి. మోచేతులు నేలకు ఆని ఉండేలా చూసుకోవాలి. కొద్దిసేపయ్యాక శ్వాసను వదులుతూ తిరిగి మామూలు స్థితికి రావాలి.
ఇది చేసిన తర్వాత మరింత ముందుకు సాగొచ్చు. ఈ దశలో ఛాతీకి దగ్గరగా అరచేతులను నేలకు ఆనించాలి. బలాన్ని చేతులపై మోపుతూ.. శ్వాసను తీసుకుంటూ తల, ఛాతీ, కడుపు భాగాన్ని పైకి లేపాలి. కొద్దిసేపు అలాగే ఉండి శ్వాసను వదులుతూ తిరిగి మామూలు స్థితికి రావాలి.
ఉపయోగాలు..
- ఉదర కండరాలను బలోపేతం చేయడానికి సహాయపడుతుంది.
- గర్భిణీ స్త్రీలలో నడుము నొప్పి, మెడ నొప్పిని తగ్గించడంలో సహాయపడుతుంది.
- మొత్తం శరీరానికి రక్త ప్రసరణను మెరుగుపరుస్తుంది.
కుంభకాసనం..
ఈ ఆసనం బెల్లీ ప్యాట్‌ పోగొట్టడానికి, శరీరాన్ని టోన్ చేయడానికి సహాయపడుతుంది. దీన్ని ప్లాంక్ భంగిమ అని కూడా పిలుస్తారు.
ఎలా చేయాలి..
నేలపై బోర్లా పడుకోండి. ఇప్పుడు మీ కాళ్ళు, చేతులను నేలపై నిలువుగా పెట్టి శరీరాన్ని పైకి లేపండి. ముఖాన్ని కిందికైనా, పైకైనా ఎలా మీకు కంఫర్ట్‌గా అలా పెట్టండి. ఇదే పొజిషన్‌లో ఉండగలిగే సేపు ఉండి గాలి వదులుతూ మామూలు స్థితికి రండి.
ఉపయోగాలు..
మీ వెనుక, కోర్, చేయి, తుంటి కండరాలను బలపరుస్తుంది.
కాన్సన్‌ట్రేషన్‌, దృష్టిని మెరుగుపరుస్తుంది.
ఈ ఆసనం మానసిక ఆరోగ్యానికి మేలు చేస్తుంది. వ్యక్తి భావోద్వేగ సమతుల్యతను కాపాడుతుంది. స్థిరత్వాన్ని అందిస్తుంది.
వశిష్టాసనం..
ఈ ఆసనం బెల్లీ ప్యాట్‌ కరిగించడానికి సహాయపడుతుంది. దీన్ని సైడ్ ప్లాంక్ భంగిమ అని కూడా పిలుస్తారు. శరీర సమతుల్యతను మెరుగుపరచడానికి, మీ పక్క పొత్తికడుపు కండరాలను టోన్ చేస్తుంది.
ఎలా చేయాలి..
కాళ్లను చాపి కూర్చోవాలి. కుడి చేతి మీద బరువు మోపి ఎడమ చేతిని పైకి ఎత్తాలి. కాళ్లను ఫొటోలో చూపినట్టుగా ఉంచాలి. రెండు కాళ్ల మీదా బరువు వేయడం వల్ల శరీరం సులువుగానే పైకి లేస్తుంది. ఈ ఆసనంలో 15 నుంచి 30 సెకండ్ల వరకూ ఉండొచ్చు.
ఉపయోగాలు..
- మీ అబ్స్, గ్లూటియస్ మెడియస్, భుజాలు, మణికట్టు బలపడుతుంది.
- ఏకాగ్రత, శరీర సమతుల్యతను పెంచడానికి సహాయపడుతుంది.
- వెన్ను గాయం ప్రమాదాన్ని తగ్గిస్తుంది.
అనులోమ విలోమ..
డెలివరీ తర్వతా.. మునపటిలా ఫిట్‌గా, యాక్టివ్‌గా ఉండాలంటే.. మీ రొటీన్‌ లిస్ట్‌లోకి అనులోమ విలోమ ప్రాణాయం చేర్చుకోవడం చాలా ముఖ్యం. అనులోమ విలోమ ప్రాణాయామం ఏకాగ్రతను, సహనాన్ని మెరుగుపరుస్తుంది. స్ట్రెస్‌ను కంట్రోల్‌ చేస్తుంది. ఈ ప్రాణాయమం మానసిక ఆరోగ్యానికి మేలు చేస్తుంది. ప్రతి రోజూ అనులోమ విలోమ ప్రాక్టిస్ చేస్తే.. ప్రశాంతంగా ఉంటారు.
ఎలా చేయాలి..?
పద్మాసనం లేదా సుఖాసనంలో కూర్చొని, కళ్లు మూసుకోవాలి. ముక్కు కుడి రంధ్రాన్ని కుడి బొటన వేలితో మూసి ఎడమ రంధ్రంతో నెమ్మదిగా శ్వాస తీసుకోవాలి. మధ్య వేలితో ముక్కు ఎడమ రంధ్రాన్ని మూసి, కుడి రంధ్రంతో శ్వాస వదలాలి. అదే రంధ్రంతో శ్వాస తీసుకొని, కుడి బొటన వేలితో కుడి రంధ్రాన్ని మూసి ఎడమ రంధ్రంతో శ్వాస వదలాలి. తర్వాత దీన్ని తారుమారు చేయాలి. అంటే.. కుడి రంధ్రంతో శ్వాస తీసుకొని, ఎడమ రంధ్రంతో వదిలి.. అదే రంధ్రంతో శ్వాస తీసుకొని, కుడి రంధ్రంతో వదలాలి. దీన్ని వీలైనంత సేపు కొనసాగించొచ్చు.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.