pregnancy yoga: గర్భిణులు.. ఏ నెల నుంచి యోగా చేయవచ్చు..?

యోగా వల్ల శారీరకంగానూ, మానసికంగానూ ఎన్నో ప్రయోజనాలున్నాయి. అలాగే యోగా ఒత్తిడిని తగ్గిస్తుందని నిపుణులు అంటారు. గర్భదారణ సమయంలో మహిళలకు ఎన్నో సందేహాలు, ఎన్నో అపోహలు ఉంటాయి. అలాంటి సందేహాల్లో యోగా సాధన చేయవచ్చా.. అని కన్ఫూజ్‌ అవుతూ ఉంటారు. ఏ నెలలలో ప్రారంభించాలి..? నిండు గర్భిణిగా ఉన్నప్పుడు యోగా సాధన చేయవచ్చా.. అనే సందేహాలు ఉంటాయి. అయితే ప్రెగ్నెన్సీ యోగాతో గర్భిణులకు చాలా మేలు జరుగుతుందని, ఆరోగ్యంగా ఉండటంతో పాటు సుఖ ప్రసవం జరిగే అవకాశాలు పెరుగుతాయని నిపుణులు అంటున్నారు. బిడ్డ ఆరోగ్యంగా పుట్టడానికి యోగా సహాయపడుతుందని అంటున్నారు. మరి యోగా సాధన ఏ నెలలో ప్రారంభించాలి, ఎలాంటి ఆసనాలు వేయాలో తెలుసుకోవాలంటే ఈ స్టోరీ చదివేయండి..
మానసికంగా, శారీరకంగా ఆరోగ్యంగా ఉండేందుకు యోగా గొప్ప మార్గం. యోగాసనం శరీరంలో రక్త ప్రసరణ, కండరాల స్థాయి, ఫ్లెక్సిబిలటీని మెరుగుపరుస్తుంది. విశ్రాంతి, ప్రాణాయామం, ధ్యానం మనస్సును ప్రశాంతంగా, సమతుల్యంగా ఉంచుతాయి. కండరాల ఒత్తిడి తగ్గి, మనస్సు ప్రశాంతంగా ఉంటుంది.

ఓ అధ్యయనం ప్రకాశం నిండు గర్భిణులు యోగా సాధన చేయవచ్చని వెల్లడించింది. గర్భిణీ స్త్రీలు సుఖాసనం, పశ్చిమోత్తాసనం, మార్జారియాసనం, బిట్లాసనం, వీరభద్రాసనం, ఉత్తానాసనం, ఊర్ధ్వ ఉత్తానాసనం, విరాసనం, ఉష్ట్రాసనం లాంటివి చేయవచ్చు.
ఏ నెలలో మొదలు పెట్టాలి..

మీరు ఇంతకు ముందు.. యోగా సాధన చేయనట్లయితే.. గర్భం దాల్చిన 14వ వారంలో యోగా ప్రారంభించొచ్చు. గర్భదారణ సమయంలోనే యోగా సాధన ప్రారంభించాలంటే.. మొదటి మూడు నెలల్లో.. యోగా చేయవద్దు. మొదటి మూడు నెలల్లో గర్భస్రావం అయ్యే ప్రమదం ఎక్కువగా ఉంటుంది. మొదటి త్రైమాసికంలో యోగా, మరేదైనా వ్యాయామం చేయడం వల్ల గర్భధారణకు హాని కలుగుతుందని ఎటువంటి ఆధారాలు లేవు. అయితే మొదటి మూడు నెలలు జాగ్రత్తలు తీసుకోవడం అవసరం.
ఐవీఎఫ్‌లో అప్పుడే వద్దు..

మీరు ఐవీఎఫ్‌ ద్వారా గర్భం ధరించినట్లైతే.. మీరు 20వ వారం తర్వాత యోగా ప్రారంభించాలి. ఐవీఎఫ్‌ విధానంలో.. కవలలు, మల్టిపుల్ ప్రెగ్నెన్సీ అవకాశాలు ఎక్కువగా ఉంటాయి, దీని వల్ల గర్భస్రావం అయ్యే ప్రమాదం ఎక్కువగా ఉంటుంది. కాబట్టి మొదటి 20 వారాలు జాగ్రత్తగా ఉండటం మంచిది. ముఖ్యంగా పొట్ట భాగంపై ఏ మాత్రం ఓత్తిడి లేకుండా అక్కడి కండరాలు రిలాక్స్‌ అవుతూ సున్నితంగా మసాజ్‌ అయ్యేలా ఆసనాల సాధన ఉండాలి.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.