హాట్.. హాట్.. పాలకూర సూప్...!

పాలకూరతో కూరలు, పకోడీలే కాదు... సూప్ కూడా చేసుకోవచ్చు. భోజనానికి ముందు... తక్కువ కెలోరీలు ఉండే... ఈ సూప్ తీసుకుంటే ఎన్నో ఆరోగ్య ప్రయోజనాలు ఉన్నాయి. జీర్ణ సంబంధ సమస్యలకు మంచి పరిష్కారం. సాయంత్రం సమయాల్లో రస్క్‌తోపాటు ఈ సూప్ తీసుకోవచ్చు. మరి... ఇంత మంచి ఆరోగ్యాన్నిచ్చే... పాలకూర సూప్‌ ఎలా తయారీ విధానం.. చూద్దామా..

పాలకూర సూప్ తయారీకి కావాల్సిన పదార్థాలు...
* పాలకూర: రెండు కట్టలు
* కందిపప్పు: ఒక కప్పు
* వేయించిన మిరియాలపొడి: అరచెంచా
* వేయించిన జీలకర్రపొడి: చెంచా
* నిమ్మరసం: రెండు చెంచాలు
* పచ్చిమిర్చి: ఒకటి లేదా రెండు
* నూనె లేదా బట్టర్: సరిపడినంత
* ఉప్పు: తగినంత



తయారీ విధానం:
* మొదట పాలకూర కట్టలను శుభ్రంగా కడిగి పెట్టుకోవాలి. ఆకులను సన్నగా తరగాలి. ఒక ప్రెషర్ కుక్కర్‌లో పాలకూర తరుగు, కప్పు కందిపప్పు తీసుకోవాలి. దీనికి రెండు కప్పుల నీటిని కలపాలి. స్టౌ వెలిగించి... నాలుగు విజిల్స్ వచ్చేవరకు పాలకూర, కందిపప్పును ఉడికించుకోవాలి.

* ఒక మందంపాటి గిన్నెను స్టౌమీద పెట్టి... తగినంత నూనె లేదా కొద్దిగా బట్టర్ వేసుకోవాలి. అందులో తరిగిన పచ్చిమిర్చి, మిరియాలపొడి, జీలకర్ర పొడి, వేయాలి. తర్వాత ఇందులో ఉడికించుకున్న పాలకూర, కందిపప్పు వేయాలి. ఇందులో ఒక కప్పు నీళ్లు పోయాలి. కాస్తా చిక్కగా అయ్యే వరకు ఆగి... తగినంత ఉప్పు, నిమ్మరసం కలిపి స్టౌ ఆఫ్ చేయాలి. ఇక ఆరగించడమే తరువాయి....