స్టఫ్డ్ అప్పడాలు

అప్పడాలు ఇష్టపడని వారు చాలా తక్కువ మంది ఉంటారు. భోజనం పెట్టగానే అందులో మొదట అప్పడమే తినేస్తారు కొంతమంది. అలాంటి అప్పడంతో కూడా రోల్ చేసుకుని తినొచ్చు. వాటినే స్టప్ట్ అప్పడాలు అంటారు.

Samayam Telugu

కావాల్సిన పదార్థాలు

అప్పడాలు - నాలుగు, ఉల్లిపాయలు - రెండు (మీడియం సైజులో ఉండేవి), బంగాళాదుంపలు - నాలుగు (మీడియంలో సైజులో ఉండేవి), టొమాటోలు - మూడు (చిన్నవి), చీజ్ - మూడు టేబుల్ స్పూన్లు, పచ్చిమిర్చి - రెండు, కొత్తిమీర తరుగు - పావు కప్పు, చాట్ మసాలా - చిటికెడు

తయారుచేసే విధానం

అప్పడాలను సన్నని మంట మీద కాల్చాలి. అవి మరీ గట్టిపడకుండానే తీసేయాలి. అంటే కరకరలాడేలా కాల్చకూడదన్న మాట. కొన్ని సెకన్ల పాటూ కాల్చేసి అవి వంగి పోకుండా అప్పడాల కర్రతో రోల్‌లా చుట్టేయాలి. ముందే బంగాళాదుంపలను ఉడికించి ముద్దలా చేసుకోవాలి. అందులో చీజ్ తురుము, ఉప్పు వేసి బాగా కలపాలి. ఇప్పుడు స్టవ్ మీద కళాయి పెట్టి కాస్త నూనె వేసి ఉల్లి తరుగును బాగా వేయించాలి. ఇప్పుడు ముందుగా రోల్ లా చుట్టుకున్న అప్పడంలో బంగాళాదుంప ముద్ద వేయాలి. దానిపై ఉల్లితరుగు, పచ్చిమిర్చి తరుగు, టొమాటో తరుగు, కొత్తిమీర తరుగు వేసి పైన చాట్ మసాలా చల్లాలి. అంతే స్టఫ్డ్ అప్పడాలు రెడీ అయినట్టే.