సంక్రాంతికి స్వీట్ పొంగల్ పోహా

ఎప్పుడు పాయసమే చేస్తే బోర్ కొడుతుంది కదా అందుకే ఈసారి స్వీట్ పొంగల్ పోహా చేసి చూడండి.

సంక్రాంతి పండుగ వచ్చేస్తోంది కదా... ఆ రోజు పులిహోరతో బూరెలు, బొబ్బట్లు, పాయసాలు కూడా చేస్తాం. ఎప్పుడూ పాయసమే చేస్తే బోర్ కొడుతుంది కదా అందుకే ఈసారి స్వీట్ పొంగల్ పోహా చేసి చూడండి. భలే రుచిగా ఉంటుంది.

Samayam Telugu

కావాల్సిన పదార్థాలు

బియ్యం నూక - రెండు కప్పులు, పెసరపప్పు - ఒక కప్పు, బెల్లం తురుము - ఒక కప్పు, కొబ్బరి తురుము - ఒక కప్పు, నెయ్యి - అరకప్పు, యాలకులు - మూడు , కిస్ మిస్‌లు - గుప్పెడు, జీడిపప్పు - అరకప్పు

తయారుచేసే విధానం

పెసరపప్పును అయిదు నిమిషాల పాటూ వేయించుకోవాలి. ఆ పెసరపప్పును కుక్కర్లో వేసి, నీళ్లు పోసి రెండు విజిల్స్ వరకు ఉడికించుకోవాలి. బియ్యం నూకని నీళ్లలో నానబెట్టాలి. అలాగే నెయ్యిలో కిస్ మిస్ లు, జీడిపప్పు వేయించి పక్కన పెట్టుకోవాలి. ఇప్పుడు స్టవ్ మీద పెద్ద గిన్నె పెట్టి అందులో నీళ్లు పోసి బాగా మరిగించాలి. నీళ్లు బాగా మరిగాక బెల్లం తురుమును అందులో వేసి ఉడికించాలి. పావుగంట సేపు ఇలా ఉడికించాలి. మధ్యలో కలుపుతూ ఉండాలి. అనంతరం బెల్లంలో నానబెట్టుకున్న బియ్యంనూకను వేసి కలపాలి. అలాగే మెత్తగా ఉడికించిన పెసరపప్పును కూడా వేసి బాగా కలపాలి. ఇప్పుడు ముందుగా వేయించిపెట్టుకున్న కిస్ మిస్ లు, జీడి పప్పు, కాస్త నెయ్యి వేసి మళ్లీ బాగా కలపాలి. ఇప్పుడు నూక మెత్తగా ఉడికే వరకు స్టవ్ మీదే ఉంచాలి. అలాగని నీరంతా ఇంకిపోయి మిశ్రమం గట్టిపడే వరకు ఉంచకూడదు. కాస్త జారుడుగా ఉన్న సమయంలో స్టవ్ కట్టేయాలి. నోరూరించే స్వీట్ పొంగల్ పోహా సిద్ధమైనట్టే.