డేటింగ్ చేసేటప్పుడు అమ్మాయిలు తీసుకోవాల్సిన జాగ్రత్తలు

డేటింగ్ చేసేటప్పుడు తొందరపాటు అస్సలు పనికిరాదు. డేటింగ్‌లో వున్నప్పుడు ఏ నిర్ణయమైనా ఆలోచించి తీసుకోకపోతే, దాని ఫలితం మరోలా వుంటుంది. అందుకే డేటింగ్ టైమ్‌లో తీసుకోవాల్సిన జాగ్రత్తలపై నిపుణులు కొన్ని సలహాలు, సూచనలని అందిస్తున్నారు. అవి ఇలా వున్నాయి.

1) తొందరపాటు పనికిరాదు:
అబ్బాయిలతో డేటింగ్ చేసేటప్పుడు, అమ్మాయిలు ముఖ్యంగా గుర్తించాల్సిన విషయం ఇది. తమ బాయ్ ఫ్రెండ్‌కి పాత గాళ్ ఫ్రెండ్ ఎవరైనా వుండి వుంటే, అతడు ఆమెతో పూర్తిగా బ్రేకప్ చేసుకున్నాడా లేక ఇంకా ఏమైనా సందిగ్ధంలో వున్నాడా అని తెలుసుకోవాలి. ఒక్కోసారి కొంతమంది అబ్బాయిలు, తమ గాళ్ ఫ్రెండ్స్‌కి పూర్తిగా దూరం కాకుండానే, కొత్తవారితో రిలేషన్‌షిప్ పెంచుకోవడానికి తొందరపడుతుంటారు. వారికున్న అభద్రతాభావమే అందుకు ఓ కారణమై వుండొచ్చు. ఇటువంటి సందర్భాల్లో ముందుగా తన బాయ్ ఫ్రెండ్‌ని పట్టిపీడిస్తున్న పాత గాళ్ ఫ్రెండ్ జ్ఞాపకాలు పూర్తిగా తొలగిపోయావా లేవా అని నిర్ధారించుకోవాలి. ఆ తర్వాతే అతడితో కలిసి ఏ నిర్ణయం తీసుకోవడానికైనా ముందడుగేయాలి.

2) పాత జ్ఞాపకాలు గుర్తుకుతీసుకురాకూడదు:
అతడి పాత గాళ్ ఫ్రెండ్ గురించి, పాత స్నేహాల గురించి పదేపదే అతడితో చర్చించకూడదు. అది అతడు తన పాత గాళ్ ఫ్రెండ్‌ని మర్చిపోకుండా జ్ఞాపకం పెట్టుకునే ఆస్కారముంది. అదే కానీ జరిగితే, మీరే అతడిలో ఆమె జ్ఞాపకాలు చెరిగిపోకుండా కాపాడిన వారు అవుతారు.

3) అతడు మిమ్మల్ని ఉపయోగించుకునే ఛాన్స్ ఇవ్వకండి:
ఆల్రెడీ ఒకరిని బాధపెట్టినవారికి ఇంకొకరిని బాధపెట్టడం పెద్ద కష్టం కాకపోవచ్చు. అటువంటి వారికి ఇతరులని ఉపయోగించుకుని వదిలేసే స్వార్థం కూడా ఎక్కువే. అందుకే అటువంటి వారికి ఎంత దూరంగా వుంటే అంత మంచిది. లేదంటే అతడి మాజీల జాబితాలో మీరు చేరిపోవడమేకాకుండా... అతడు మిమ్మల్ని తన అవసరాలకి ఉపయోగించుకునే ప్రమాదం కూడా ఉంది.

4) అపనమ్మకంగా వ్యవహరించకండి:
ఇంతకుముందు ఓ గాళ్ ఫ్రెండ్‌ని వదిలేశాడు కదా అని మీతో డేటింగ్ చేస్తున్న అబ్బాయిని అపనమ్మకంతో అనుమానించకండి! జాగ్రత్తగా వ్యవహరించడంలో తప్పు లేదు కానీ అదే పనిగా అతడిని అనుమానిస్తేనే అది మీ రిలేషన్‌షిప్‌ని దెబ్బతీయవచ్చు. గతంలో ఓ గాళ్‌ఫ్రెండ్‌కి దూరమయ్యాడు కదా అని వారిని తప్పు పట్టడానికి వీల్లేదు. ఎందుకంటే గతంలోనే గాళ్ ఫ్రెండ్‌కి దూరమైన వారు ఈసారి నిజాయితీగానే మిమ్మల్ని ఇష్టపడవచ్చు. అందుకే ఏ నిర్ణయమైనా ఆలోచించకుండా తొందరపడి తీసుకోకూడదు అంటున్నారు నిపుణులు.