అనుమానించే గర్ల్ ఫ్రెండ్‌ను డీల్ చేయండిలా..

కొందరు అమ్మాయిలకు ఎంత ప్రేమ ఉంటుందో అంత అనుమానం కూడా ఉంటుంది. ఏ చిన్న పని చేసినా, ఏ చిన్న విషయాన్ని తన దగ్గర దాచినా అనుమాన భూతంతో మనకు పిచ్చెక్కిస్తుంటారు. వారు కురిపించే ప్రేమ ముందు అనుమానం అనే విషయం చిన్నదే అయినప్పటికీ.. ఒక్కోసారి మాత్రం ఇదేం ఖర్మ రా బాబు అనుకోకుండా ఉండలేం. అసలు తనను ఎలా డీల్ చేయాలా అని ఏదో ఒక దశలో ఆలోచించాల్సిన పరిస్థితి వచ్చినా ఆశ్చర్యం లేదు. అమ్మాయిలంతా ఈ కేటగిరీకే చెందిన వారని చెప్పడం తప్పు కానీ.. మీ గర్ల్ ఫ్రెండ్ కూడా ఈ కోవకు చెందిన వ్యక్తే అయితే.. తనను ఎలా డీ చేయాలో తెలుసుకోండి.

అనుమానంతో ఎంతో కాలం కలిసి ముందుకెళ్లలేం. ఏ బంధంలోనై అనుమానం అనే విష బీజం మొలకెత్తిందే ఇక అంతే. అభద్రతా భావం, అబద్ధాలు, మోసం, కోపం, హార్టవడం.. ఇలా ఒకటేమి గురూ... రకరకాలుగా టార్చర్ ఉంటుంది. నేను ఏ అమ్మాయితో మాట్లాడినా నా గర్ల్ ఫ్రెండ్ అనుమానిస్తోంది అని కొందరు వాపోతుంటారు. మనల్ని ప్రేమించే వ్యక్తే అనుమానిస్తున్నప్పుడు వారిని దారికి తీసుకురావడానికి మన దగ్గరున్న ఏకైక మందు ప్రేమే అని గుర్తించండి.

మీకు ఈ మధ్యే తనతో పెళ్లయి ఉంటే మాత్రం.. తనతో ఎక్కువ సమయం గడపడానికి ప్రయత్నించండి. తను మీ నుంచి చాలా కోరుకుంటుందనే విషయాన్ని గుర్తించండి. తన కోసం పూలు తీసుకెళ్లడం.. ప్రతి చిన్న విషయానికి పొగడటం లాంటి పనులు చేస్తుండాలి. మీరు బిర్యానీ పెట్టకపోయినా ఫర్వాలేదు గానీ పొగిడితే చాలు.. అమ్మాయిలు పడిపోవడం ఖాయం. మీకు తనపై ఎంతో ప్రేమ ఉండొచ్చు. కానీ దాన్ని తరచుగా వ్యక్తపరచకపోతే తనకు తెలియదు కదా. మీ మాటల ద్వారా, ప్రవర్తన ద్వారా తనపై మీకున్న ప్రేమను వ్యక్తపర్చండి.

రోజులో కనీసం ఓ గంట సమయాన్ని తనకోసం వెచ్చించండి ప్రతి రోజూ తనతో గంటల కొద్దీ టైం స్పెండ్ చేయడం సాధ్యం కాకపోవచ్చు గానీ.. ఓ గంట సేపయితే గడపొచ్చు. తను ఏం చెబుతుందో ఓపికగా వినండి. కలిసి బయటకు వెళ్లండి. మీరిద్దరూ విడిగా ఉంటుంటే.. వీలైనప్పుడల్లా ఫోన్ చేయండి. లేదంటే వాట్స‌ప్ ద్వారానైనా పలకరించండి. అనుబంధం కొనసాగడానికి కమ్యూనికేషన్ ఎంతో అవసరం అని గుర్తించండి.

మీరు సరైన వ్యక్తితోనే ఉన్నారా లేరా అనే విషయాన్ని నలుగురిలో తన ప్రవర్తన ద్వారా అంచనా వేయొచ్చు. తనున మీ ఫ్రెండ్స్‌తో అతుక్కొని ఉంటున్నా.. లేదా ముభావంగా ఉంటున్నా.. అది అభద్రతా భావానికి నిదర్శనం. మీ ఫ్రెండ్స్‌తో తను మాటలు కలిపేలా చూడండి. ముఖ్యంగా ఎవరి గురించైతే తను అనుమానంగా ఉందో వారితో కలిసిపోయేలా చూడండి. తను మీ జీవితంలో, మీ ఫ్రెండ్స్ సర్కిళ్లో ఓ భాగమని భావించేలా చేయండి. మీ స్నేహితులు, వారితో గడపటం అనేది ఎందుకు ముఖ్యమో తను అర్థం చేసుకోనివ్వండి. తను ఎంతగా అర్థం చేసుకుంటే అనుమానించడం అంత తగ్గుముఖం పడుతుంది.

మీ ఫ్రెండ్ విషయంలో తనకు అనుమానం ఉంటే.. డబుల్ డేట్‌కు ప్లాన్ చేయండి. మీ ఫ్రెండ్ తన బాయ్ ఫ్రెండ్‌తో బయటకు వెళ్తుంటే మీరిద్దరు కూడా వారితో కలిసి వెళ్లండి. ఎందుకంటే.. తన ముందు మీ గర్ల్ ఫ్రెండ్‌తో మీరు చనువుగా ఉంటే.. తన అనుమానం తగ్గుముఖం పడుతుంది. మీరు తనకు సమయం కేటాయిస్తున్నా.. తనకు అన్ని విషయాల్లో సహకరిస్తున్నా సరే.. తన తీరులో మార్పు లేకపోతే మీరు చేసేదేం లేదు. ఇక మారాల్సింది తనే.