తొలి పరిచయంలోనే అలా కలవొచ్చా..?

ప్రశ్న: రెండు నెలలుగా నేను ఒక వ్యక్తితో మాట్లాడుతున్నాను. మా మధ్య దాపరికాలు లేకుండా అన్ని విషయాలను స్వేచ్ఛగా పంచుకుంటున్నాం. కానీ.. ఇప్పటి వరకు నేను అతడ్ని చూడలేదు. రానున్న అక్టోబరులో ఇద్దరం పర్సనల్‌గా కలవాలని డిసైడ్ అయ్యాం. ప్రేమలో పడిన తర్వాత తొలిసారి కలుస్తుండటంతో అది తీపిగుర్తుగా మిగిలిపోవాలని శారీరకంగా కూడా కలుద్దామని అతను అంటున్నాడు. నేను మొదట అంగీకరించాను. కానీ.. ఈ మధ్య నాలో అభద్రతా భావం మొదలైంది. ఎందుకంటే నేను ఫోన్ చేస్తే తప్ప అతను ఫోన్ చేయడు. కానీ.. నాతో రొమాంటిక్ చాట్ మాత్రం చాలా శ్రద్ధగా చేస్తాడు. కాబట్టి ఈ సమయంలో అతనితో శారీరకంగా దగ్గరైతే.. భవిష్యత్‌లో ఏమైనా ఇబ్బందులు వస్తాయా..? గతంలో ఇలా మోసపోయిన అనుభవం నాకు ఉంది. అదీగాక అతను నన్ను లాంగ్‌రైడ్‌కి తీసుకెళ్తానని చెప్తున్నాడు. దీంతో నాలో ఆందోళన పెరుగుతోంది. దయచేసి సలహా ఇవ్వగలరు. - ఓ సోదరి

జవాబు: కొత్త పరిచయాలు మన ఓపికకు పరీక్షలాంటివి. తొందరపడితే జీవితాలే తారుమారైపోతాయి. కాబట్టి అపరిచితులతో ఎక్కువ కాలం రిలేషన్‌షిప్‌ని కొనసాగించడం మంచిది కాదు. మీరు అతడ్ని ఇష్టపడుతున్నానని, అన్ని వ్యక్తిగత విషయాలను షేర్ చేస్తున్నానని రాశారు. కాబట్టి తొలిసారి అతడు మిమ్మల్ని కలిసినప్పుడు సంతోషపెట్టాలనే తాపత్రయం మీలో ఉండటం సహజం. కానీ.. కలిసిన తొలిసారే శారీరకంగా కలుద్దామనే నిర్ణయాన్ని మాత్రం పునారాలోచిస్తే మంచిదేమో. ఎందుకంటే ఇంకా మీరు ఒకరినొకరు అర్థం చేసుకునే స్టేజ్‌లోనే ఉన్నారు. కాబట్టి తొందరపాటు నిర్ణయం తీసుకుంటే.. భవిష్యత్‌లో చాలా ఇబ్బందులు ఎదుర్కోవాల్సి రావొచ్చు. ఇప్పటికే ఒకసారి చేదు అనుభవం ఉందని రాశారు.. మరోసారి అలాంటి బాధ పడకూడదు అనుకుంటే.. జాగ్రత్తగా అడుగులేయండి.

సలహా ఇచ్చిన వారు డాక్టర్ ఎరాదత్తా, సైకియాట్రిస్ట్