నాకు పెళ్లైంది కానీ.. అలవాటు వదల్లేకున్నా

ప్రశ్న: నాకు వివాహమైంది. ప్రస్తుతం ఆరేళ్ల బాబు ఉండగా.. నా భార్య గర్భవతి. ఏడాది క్రితం నా భార్యపై ఆసక్తి సన్నగిల్లడంతో సెక్స్ వర్కర్ల దగ్గరికి వెళ్లడం ఆరంభించాను. క్రమంగా అదో వ్యసనంలా మారిపోయింది. విలువైన సమయంతో పాటు పెద్ద మొత్తంలో డబ్బులు వృథా చేస్తున్నాననే అపరాధ భావం ఇప్పుడు నాలో కలుగుతోంది. కానీ.. అలా వెళ్లాలనే ఆలోచల్ని మాత్రం నియంత్రించుకోలేకపోతున్నాను. ఈ విషయం తెలిస్తే నా భార్య, పిల్లలు ఎక్కడ నాకు దూరమవుతారనే ఆందోళన నాలో మొదలైంది. కానీ.. ఈ అలవాటు మానలేకున్నా. దయచేసి సలహా ఇవ్వగలరు - పేరు రాయలేదు.

జవాబు: మీకు మీరుగా తప్పును సరిదిద్దుకోవాలనే ఆలోచన రావడం అభినందనీయం. సెక్స్ వర్కర్లతో సంబంధాలు మీ కుటుంబ అనుబంధాల్ని దెబ్బతీస్తాయి. ఇప్పటికే మీకు ఒక పిల్లాడు ఉన్నాడు.. మరొకరు త్వరలోనే కుటుంబలోకి రానున్నారు. ఈ నేపథ్యంలో భర్తగా మీ భార్యకి మద్దతు చాలా అవసరం. పిల్లలకి మెరుగైన జీవితం అందించేందుకు ఆర్థికంగా కూడా మీరు స్థిరపడాల్సిన అవసరం ఉంది. కాబట్టి తొలుత మీరు సెక్స్ వర్కర్ల దగ్గరికి ఎందుకు వెళ్లాలి అనుకుంటున్నారో మీకు మీరే ప్రశ్నించుకోండి. మీ భార్య పడక సుఖం అందివ్వడం లేదా..? మీరు చెప్పినట్లు నడుచుకోవడం లేదా..? కొత్తదనం కోసం పరితపిస్తూ వెళ్తున్నారా..? కారణం ఏదైనా.. మీ కుటుంబానికి, ఆరోగ్యానికి దీర్ఘకాలం ఈ అలవాటు చెడు చేస్తుంది. సెక్స్ వర్కర్లు కేవలం డబ్బు పరంగా చూస్తారే తప్ప.. వారిలో మీకు కావాల్సిన ప్రేమ అనుబంధాలు ఉండవనే విషయాన్ని మీరు గుర్తించాలి. అలాంటి వారి కోసం సమయం, డబ్బు వృథా చేసుకోవడం దేనికి..? మీకు అలాంటి చెడ్డ ఆలోచనలు వచ్చినప్పుడు మీ భార్యతో ప్రేమగా మాట్లాడేందుకు ప్రయత్నించండి. అప్పటికీ మీ ఆలోచన తీరు మారకపోతే.. సైకాలజిస్ట్‌ని కలిసి కౌన్సెలింగ్ తీసుకోండి.

సలహా ఇచ్చిన వారు- జోషి, సైకాలజిస్ట్, ముంబయి